Qırımtatar bayrağı künü hayırlı olsun!

26.06.2025

Er yıl ilk yaz ayınıñ 26-nda qayd etilgen Qırımtatar bayrağı künü qırımtatar halqı ve Ukrayinanıñ yañı tarihında müim künlerden biri oldı.

1917 senesi ilk qış ayında Bağçasarayda toplanğan tarihiy I-nci Qırımtatar Milliy Qurultayınıñ delegatları tarafından tasdıqlanğan qırımtatar milliy bayrağı, 1991 senesi ilk yaz ayınıñ 26-30 künleri Aqmescitte keçirilgen II-nci Qırımtatar Milliy Qurultayınıñ delegatları tarafından milliy bayraq statusında tasdıqlandı. Böylece, Qırımtatar bayrağı kününen beraber bugün biz de bu müim vaqiağa – qırımtatar halqınıñ öz vatanında – Qırımda Qurultay tarafından tarihiy canlanuvınıñ 34 yıllığını qayd etemiz.

Qırımtatar bayrağı qırımtatar halqınıñ qırılmazlığınıñ, onı doğurğan ve şekillendirgen, asırlar devamında devleti olğan Qırım toprağından ayırılmazlığınıñ timsalidir.

Qırımtatar halqınıñ 2014 senesi Qırımnıñ Rusiye işğaline qarşı muqavemet ve Ukrayinanıñ topraq bütünligine qol tutqan kütleviy çıqışları sayesinde qırımtatar bayrağı ukrayin cemiyeti ve halqara toplulıqnıñ añında Qırım ve onıñ tamır halqınıñ kerçek timsali, em de yarımadanıñ işğalden qurtarıluvı ve Ukrayinanıñ topraq bütünliginiñ ğayrıdan tiklenmesi içün küreş timsali oldı.

Bugün qırımtatar bayrağı – Qırımnıñ Ukrayinanen bölünmezliginiñ işareti. Şübesiz ki, Ukrayinanıñ havfsızlıq ve mudafaa quvetleriniñ cesür askerleri sayesinde, olarnıñ saflarında Ukrayinağa qırımtatar askerleri de qol tutalar, qırımtatar bayrağı bütün Qırım üzerinde Ukrayina devlet bayrağınen beraber qırımtatar muhtar cumhuriyetiniñ timsali olaraq inkişaf etecek.

Qırımtatar Milliy Meclisi adından bütün semetdeşlerim ve vatandaşlarımnı Qırımtatar bayrağı kününen samimiy hayırlayım!

Yaşasın Qırımtatar halqı!

Ukrayinağa şan-süret!

Qırımtatar Milliy Meclisiniñ Reisi

Refat Çubarov

2025 senesi ilk yaz ayınıñ 26-sı,

Kıyiv ş.