İstanbulda İİTnıñ Tış işleri nazirleri Şurasınıñ sessiyası olıp keçti

23.06.2025

İlk yaz ayınıñ 22-nde İstanbulda İslâm İşbirligi Teşkilâtınıñ (İİT) Tış işler nazirleri Şurasınıñ eki künlik sessiyası yekünlendi, onıñ işinde davet etilgen musafirler olaraq Ukrayina halq mebusı, qırımtatar halqınıñ lideri Mustafa Cemilev ve Qırımtatar Milliy Meclisiniñ reisi Refat Çubarov iştirak ettiler.

Bundan da ğayrı, İİTnıñ Tış işler nazirleri şurasınıñ sessiyası arfesinde Qırımtatar Milliy Meclisi onıñ iştirakçilerine mahsus beyanatnen muracaat etip, İİTnıñ aza devletlerini Ukrayinanı faal desteklemege ve qırımtatar halqını qorumağa çağırdı.

Sessiya çerçivesinde Mustafa Cemilev ve Refat Çubarov Türkiye tış işler naziri Hakan Fidan ve İİTnıñ Tış işler nazirleri şurasınıñ bir sıra diger iştirakçilerinen körüşüvler keçirdiler, körüşüvlerde Ukrayinağa qarşı Rusiye tecavuzı ve Rusiye tarafından işğal etilgen Qırımda tamır qırımtatar halqınıñ vaziyetinen bağlı meseleler muzakere etildi.

Sessiyanıñ bir qısmı, şu cümleden İİTnıñ Tış işler nazirleri şurasınıñ qararları ve diger qararlarınıñ qabul etilmesi, tek nazirler ve yardımcılarınıñ iştirak etkenleri qapalı rejimde keçti.

İİTnıñ azası olmağan memleketlerde musulmanlarnıñ vaziyetini muzakere etüv neticesinde aşağıda berilgen musulman qırımtatarlarğa nisbeten rezolütsiya qabul etildi.

Qırımtatar Milliy Meclisiniñ reisi Refat Çubarovnıñ fikirince, İİTnıñ Tış işler nazirler şurasınıñ sessiyasında işğal etilgen Qırımda qırımtatar halqınıñ vaziyetine dair rezolütsiyanıñ qabul etilmesi, Qırımtatar Milliy Meclisi ve tış siyasette Ukrayinağa qoltutqan ve qırımtatarlarnı qorçalağan devletlerniñ eyyetleri tarafından yapılğan ğayretlerniñ neticesi ola.

Rezolütsiyada (belli ki, Rusiyeni) siyasiy sebeplerden azatlıqtan marum etilip apiske alınğan qırımtatarlarnı acele azat etmege çağırdılar.

Rezolütsiya, İİTnıñ Tışqı işler nazirleri Şurasınıñ 2026 senesi keçirilecek 52-nci sessiyasına mütenasip maruza azırlamaq maqsadınen, İİTnıñ Baş kâtibi ve Teşkilâtnıñ diger institutlarınıñ qırımtatar halqınıñ aq-uquqları vaziyeti boyunca nezaret ve tedqiqatlarnıñ keçirilmesine doğrudan-doğru celp etilmesine imkân bere.

Refat Çubarovnıñ qayd etkenine köre, rezolütsiyada Rusiye Federatsiyasını takbih etken açıq-aydın ifadelerniñ yoqluğı ve vesiqanıñ körümsizligi, Ukrayinağa qarşı Rusiye tecavuzını açıqtan takbih etmekten saqınğan İİTnıñ aza devletleriniñ nazar noqtasından kele.

Refat Çubarov şunı da qoştı ki, Qırımtatar Milliy Meclisi, Rusiye tarafından işğal etilgen Qırımda tamır qırımtatar halqınıñ taqip etilmesinen bağlı kerçek vaziyetni añlamaq içün, İİTnıñ aza devletlerinen işbirlikni keñleştirmege tırışacaq.

Наводимо НЕОФІЦІЙНИЙ переклад затвердженої резолюції:

Qayd etilgen rezolütsiyanın RESMİY OLMAĞAN tercimesi:

OIC/CFM-51/2025/MM/RES/FINAL/31

№5/51-MM MUSULMAN-QIRIMTATARLARNIÑ VAZİYETİNE DAİR REZOLÜTSİYA

İstanbulda, Türkiye Cumhuriyetinde, 2025 senesi ilk yaz ayınıñ 21-22 künleri (25-26 Zilhicce 1446 s.) olıp keçken İslâm İşbirligi Teşkilâtınıñ Tış işler nazirleri Şurasınıñ elli birinci sessiyası (mevzu: “Deñişken dünyada İİT”)

1. Vaqtınca işğal etilgen Qırımda soñki adise-vaqialar sebebinden musulman-qırımtatarlarnıñ vaziyetinen bağlı qasevetini bildire;

2. Qırımtatarlarnıñ statusı, havfsızlığı ve qoruvı meselelerini kerekli derecede çezmek ve olarnıñ diniy, medeniy, tasil ve mülkiyet aqlarına semereli irişimini temin etmek kerekligini qayd ete;

3. Musulman-qırımtatarlarnıñ havfsızlığı ve qoruvını temin etmek müimligini qayd ete;

4. Siyasiy sebeplerden apiske alınğan qırımtatar halqınıñ liderlerini acele azat etmege çağıra;

5. Baş kâtibini, soñki vaqialar çerçivesinde qırımtatarlarnıñ vaziyetine dair kerekli alâqalarnı ve tedqiqlerni keçirmege teşviq ete;

6. Baş kâtibini bu qararnıñ amelge keçirilmesini nezaret etmege ve tış işler nazirleri şurasınıñ 52-nci sessiyasında esabat bermege rica ete.