Qırımtatar Milliy Meclisiniñ Qurban Bayramı munasebetinen hayırlavı

06.06.2025

İslâm dinini kütken semetdeşlerimiz!

Sevgili qardaşlar!

Qırımtatar Milliy Meclisi sizni islâmnıñ eñ müim ve eñ ürmetli bayramlarından biri olğan Qurban Bayramnen samimiy şekilde hayırlay.

Qurban Bayramı qırımtatar halqı içün, iman, fedakârlıq, merhamet ve birlik timsali olmaqtan ğayrı, milliy kimlik, til, medeniyet, tarih ve Vatanğa sadıqlıq saqlavnıñ müim bir faktorı ola.

Bu sene Qırımnıñ vaqtınca işğali şaraitinde Qurban Bayramnı tekrar qarşılaymız. Biñlernen qırımtatar evlerini terk etmege mecbur oldı, biñlernen kişi repressiyalar, taqipler, tevqifler ve apis cezalarına oğradı. Qırımtatar halqı kene bölündi — tuvğan, amma işğal etilgen Qırımı, esas Ukrayina ve dünyanıñ bir çoq diger memleketleri arasında.

Amma tamır qırımtatar halqı öz menligini saqlap, Qırımnı işğal etken ve Ukrayinanı yoq etmege tırışqan Rusiye duşmanına qarşı tura. Yüce Allahqa Ukrayina devletiniñ suverenitetini ve topraq bütünligini qorçalağan cesür ukrayin askerleriniñ, olarnıñ arasında çoqusı musulmanlarnıñ, ayatlarını saqlap qalmasını rica etemiz.

Dualarımızda Kreml mabüsleri — Rusiye barbarları tarafından siyasiy sebeplerden azatlıqtan marum etilgen Qırım sakinleri — de bar. Olarnı azat etmek içün yapqan ğayretlerimizni toqtatmaycaqmız.

Sevgili qardaşlar!

Bu sene Qurban Bayramınıñ qayd etilüvi er birimizniñ imanını daa da quvetleştirsin, qırımtatar halqınıñ aqları oğrunda küreşimizde, siyasiy mabüsler ve qorantalarına qol tutuvımızda, Ukrayina havfsızlıq ve mudafaa quvetlerine yardım etüvimizde birdemligimizni quvetleştirsin.

Er bir qorantağa barışıq, sağlıq, aenk ve refaqat tileymiz.

Qurban bayramıñız mübarek olsun!

Qırımtatar Milliy Meclisiniñ Reisi

Refat Çubarov