Qırımda FSB 83 yaşındaki Zevcet Kurtumerovnı tuttı

23.05.2025

İşğal etilgen Qırımda FSB qırımtatar milliy areketiniñ 83 yaşındaki veteranı Zevcet ağa Kurtumerovnı tuttı. Bunı Qırımtatar Milliy Meclisiniñ reisi Refat Çubarov bildirdi.

“Rusiye barbarları tarafından işğal etilgen Qırımdan daa bir yaramay haber: bugün saba öz evinde Rusiye FSBsiniñ cezalandırıcıları tarafından qırımtatar milliy Qurultayınıñ delegatı, Bütündünya qırımtatar kongressiniñ İcra şurasınıñ azası Zevcet ağa Kurtumerov tutulıp, belli olmağan yerge ketirildi”, – dep Refat Çubarov bildirdi.

Çubarovnıñ malümatına köre, FSB hadimleri Zevcet ağanı evden alıp ketkenler, bir qaç saatten soñ onı azat eteceklerini ve onıñ evge qaytacağını aytqanlar, amma saat 17:00-ge qadar tutulğan adam aqqında bir haber kelmedi.

Zevcet ağa Kurtumerov qırımtatar milliy areketiniñ faal iştirakçilerinden biridir, 2025 senesi ilk küz ayında 83 yaşına kirecek. Soñki yılları Zevcet ağa kanser hastalığından tedaviylene edi, keçken sene de oña yürek stentleri qoyuldı.