Kıyivde “UNIDAY” Ukrauina milliy azlıqları ve tamır halqları festivali olıp keçti

26.05.2025

Mayısnıñ 24-nde Kıyivdeki Halq iqtisadiyatınıñ muvafaqiyetleri sergisinde (HİMS) Halqara birdemlik ve medeniy çeşitlik kününe bağışlanğan “UNIDAY” milliy azlıqlar (toplıqlar) ve Ukrayina tamır halqlarınıñ festivali olıp keçti. Tedbirde 45-ten çoq milliy toplulıq ve Ukrayina tamır halqlarınıñ temsilcileri toplandı, olar öz medeniyetleri, tilleri, ananeleri ve kimliklerini taqdim ettiler.

Festivalniñ açılışında Ukrayina Yuqarı Şurası Reisiniñ Birinci muavini Oleksandr Korniyenko, Ukrayina Prezidentiniñ Qırım Muhtar Cumhuriyetindeki Daimiy Temsilcisiniñ muavini Denıs Çıstikov, Ukrayina Nazirler Şurasınıñ naziri Oleğ Nemçinov, Ukrayina Yuqarı Şurasınıñ insan aqları vekâletlisi Dmıtro Lubinets, Ukrayina qavmiy siyaset ve vicdan serbestligi devlet hızmetiniñ başı Viktor Yelenskıy, Qırımtatar Milliy Meclisiniñ reisi Refat Çubarov, Ukrayina Milliy toplulıqlar şurasınıñ reisi Aşot Avanesân, Council of Europe leyha idarecisi Zemfira Kondur ve “House of Europe” programmasınıñ İdarecisi Frantsıska Simon çıqışta bulundılar.

Qırımtatar Milliy Meclisiniñ reisi Refat Çubarov çıqışta bulunıp, cenk şaraitinde milletlerara birlik ve bir-birine sayğı strategik emiyetke malik olğanını qayd etti. Ukrayina milliy toplulıqları ve tamır halqlarını birleştirgen tedbirler, еул medeniy birliginiñ nümünesi degil, aynı zamanda istilâcınıñ ukrayin siyasiy milletini yoq etmek ıntıluvlarına cevap ola.

“Böyle tedbirler ukraнin cemiyetiniñ birdemligini köstere ve Ukrayinanı, ukrayin milletini, bütün milliy toplulıqlarnı ve tamır halqlarını, ukrain siyasiy milletiniñ terkibiy qısımlarını esir etmek içün Rusiyeniñ barbar planlarına qarşılıq kösterüvidir. Böyle areketler ve birliknen biz ğalebe qazanırmız. Birligimizniñ eñ küçlü numayışı – Ukrayina havfsızlıq ve mudafaa quvetleriniñ bölüklerinde, er qavmiy mensüplikten olğan cesür askerler ukrayin devletiniñ topraq bütünligini qorçalaylar”, – dep Refat Çubarov qayd etti.

Festivalde Meclis azası ve QMM İdaresiniñ reisi Eskender Bariiev yolbaşçılığında Qırımtatar maaliy merkeziniñ taqımı tarafından qırımtatar halqı taqdim etildi: kitapları, milliy timsalleri, ananeviy urbaları ve turmuş eşyaları, 1944 senesi qırımtatar halqınıñ genotsidi aqqında malümat ve Qırım siyasiy mabüslerine mektüplerni yazma zonası taqdim etildi.

Aynı şu künü Ukrayina milliy toplulıqlarınıñ temsilcileri arasında Qaramanlar Alleyası – devletimizniñ mustaqilligi ve serbestligini qorçalap elâk olğan askerlerniñ hatırasına bağışlanğan ekspozitsiya – açıldı.