Suspilne Qırım “Пам’ять/Hatıra” vesiqalı leyhasını taqdim etti

20.05.2025

Qırımtatar halqınıñ genotsid fedalarınıñ hatıra kününe Suspilne Qırım taqımı “Пам’ять/Hatıra” vesiqalı leyhasını azırladı. Onı mayısnıñ 19-nda Kıyivdeki Qırım musulmanları diniy idaresinde taqdim etti. Tedbirniñ teşkilâtçısı “Crimea vox” mediası oldı.

Tedbirni Meclis reisiniñ birinci muavini, Ukrayinanıñ Türkiyedeki fevqulâde ve vekâletli elçisi Nariman Celâl idare etti. Qırım musulmanları diniy idaresiniñ müftisi Ayder Rustemov, elâk olğan qırımtatarlar içün dua oqudı ve vatanğa –  işğalden azat etilgen Qırımğa qaytmaq içün dua etti.

Qırımtatar Milliy Meclisiniñ reisi Refat Çubarov qayd etti ki, insanlarnıñ şahsiy hatıralarını tüzetken kollektiv hatıralarını saqlamaq pek müimdir.

“Ve cemaat hatıralarınıñ bozulmaması, yañlışlanmaması pek müimdir. Bir halqnı öldürmege ya da esir etmege istegenler onıñ hatırasını bozıp, sahte qıymetlerni şekillendire”, – dep Çubarov qayd etti ve qoştı ki, eger hatırasını bozmağa imkân olmasa, halqnı fizikiy ceetten öldürmege başlarlar.

O, “Пам’ять/Hatıra” kibi leyhalar “pek müim olğanını qayd etti, çünki şahsiy hatıralar insanlarnıñ kollektiv hatıralarını tasdıqlay”.

Munaqaşağa Birleşken Milletler Teşkilâtınıñ tamır halqları meseleleri daimiy forumınıñ maruzacısı Süleyman Mamutov ve Ukrayina Arbiy Silâlı Quvetleriniñ polkovnigi Ali Bekirov qoşuldılar.