Yuqarı Şura, halqara toplulıqqa Qırımtatar halqınıñ genotsid fedalarınıñ hatırasını añmaq çağıruvını qabul etti

14.05.2025

Bugün, mayısnıñ 14-nde Ukrayina Yuqarı Şurası halqara toplulıqqa Qırımtatar halqınıñ genotsid fedalarınıñ hatırasını añmaq ve rusiye tarafından Qırımtatarlarnıñ aq-uquq ve serbestliginiñ bozuluvını toqtatmaq içün ğayretlerni birleştirmek muracaatını qabul etti.

Qararğa 310 halq mebusı rey berdi.

YŞnıñ qararında çetel devletlerniñ ükümetleri ve parlamentleri Qırımtatarlarnıñ sürgünligini genotsid olaraq tanığan memleketlerge qoşulmağa çağırdılar – olar arasında Latviya, Litvaniya, Kanada, Poloniya, Estoniya, Çehiya.

Qararnıñ teşebbüsçilerinden biri olğan Ukrayina halq mebusı Tamila Taşeva Facebook saifesinde bu qararğa tefsir etip, bu qararnıñ müimligini qayd etti:

“O, genotsid fedalarınıñ hatırasını añdıra, em de dünyağa Qırımtatarlarnıñ ve işğal etilgen topraqlardaki bütün Ukrayinlerniñ aqları oğrunda küreş devam etkenini hatırlata. Ukrayina açıq-aydın ayta: tamır halqlarınıñ aqları oğrunda küreşimiz toqtalmaycaq, dünya toplulığı bu küreşke qol tutmalı. Bu Beyanat, Qırım meselesi em Ukrayin siyasetiniñ, em de halqara ortaqlarımıznıñ diqqat merkezinde qalması içün nevbetteki adımdır”.

Qarar qabul etilgende Qırımtatar halqınıñ lideri Mustafa Cemilev, tarihiy hatıra müimligini hatırlatıp, destek sözlerini seslendirdi.

Qırımtatar Milliy Meclisiniñ reisi Refat Çubarov Ukrayina Yuqarı Şurasınıñ reberligine, Ukrayina halq mebuslarına, hususan – Tış siyaset ve parlamentlerara işbirlik meseleleri eyyetine, Ukrayina Prezidentiniñ Qırım Muhtar Cumhuriyetindeki Temsilciligine, halq mebusları Mustafa Cemilev, Tamila Taşeva, Ahtem Çiygözge, em de Ukrayina Tış işler nazirligine, Qırımtatar Milliy Meclisiniñ azalarına Qırımnı işğalden qurtaruvğa ve tamır Qırımtatar halqına qol tutuvğa doğrultılğan ğayretlerni birleştirgenleri içün teşekkürler bildirdi.