Mayısnıñ 2-nde Zaporijjâda elâk olğan arbiy Zinur Ametkanı defin etecekler

01.05.2025

2025 senesi çiçek ayınıñ 26-nda arbiy vazifesini eda etkende lâğabı “Rey” olğan, “Azov” mahsus vazifesi 12 brigadasınıñ 3057 arbiy bölüginde hızmet etken asker Zinur AMETKA elâk oldı. 

Zinur Ametka 2004 senesi qara qış ayınıñ 18-nde Zaporijjâ vilâyetiniñ Yakımiv rayonında İsmail ve Minara Ametkalarnıñ çoq balalı Qırımtatar qorantasında doğdı. 

Zinur Ametka sportnen çoq meraqlana edi, kollecni bitirgen soñ bala idmancılığınen oğraştı ve “Zaporizka politehnika” Milliy universitetinde oquy edi. 2023 senesi universitetniñ 3-ünci kursında “Azov” mahsus brigadasında hızmet etmege istegenini bildirip, Ukrayina Mudafaa quvetlerine göñülli olaraq celp etildi.

Zinur Ametka, mesüliyetli ve cesür bir asker edi. Genç olğanına baqmadan, arbiy safdaşları arasında itibar ve sayğığa lâyıq edi. Bir qaç kere komandanlıq mukâfatınen taqdirlendi.

Zinur Ametkanıñ cenazesi mayısnıñ 2-nde Zaporijjâ şeherinde keçirilecek. Qaramannıñ cesedi ana-babası, arbiy qardaşları, tuvğanları ve yaqınlarına berilecek.

Qırımtatar Milliy Meclisi ve şahsen men ana-babası İsmail ve Minara, qardaşı Alime, ağa-qardaşları Dilaver ve Serverge oğlu ve ağa-qardaşı Zinurnıñ ölümi sebebinden samimiy taziyelerimizni bildiremiz.

Allah rahmet eylesin!

Refat Çubarov

Qırımtatar Milliy Meclisiniñ Reisi

2025 senesi mayısnıñ 1-i

Kıyiv ş.