TİKA Qırımtatar tiliniñ inkişafı institutına tehnika berdi

18.04.2025

Türkiye işbirlik ve koordinatsiya agentligi (TİKA) “Qırımtatar tiliniñ inkişafı institutı” cemaat birleşmesine Qırımtatar tilinde kitaplarnı ve Qırımtatar tili, edebiyatı, tarihı ve medeniyetinen bağlı arhiv materiallarını raqamlandırmaq içün kerek olğan tehnikanı (hususiy skaner ve kompyuterler) berdi.

“Bu, yazma şeklinde saqlanğan ve, yazıq ki, vatandaşlarımıznıñ çoqusı içün irişilemez olğan til ve edebiyat mirasımıznıñ saqlanması ve tarqatılması içün müimdir. Bu maqsatnen, dünyanıñ çeşit köşelerinden insanlar til, edebiyat, tarih, medeniyet ve ilâhre malümatlarğa doğrudan irişe bilecek büyük onlayn platformanı meydanğa ketirmek planlaştırıla”, – dep İnstitutnıñ yolbaşçısı Mustafa Ametov tarif etti.

Tehnikanı teslim etüv merasiminde Qırımtatar tiliniñ inkişafı institutınıñ vekilleri, Qırımtatar Milliy Meclisiniñ reisi Refat Çubarov ve Ukrayinada TİKA programmalarınıñ koordinatorı Yahya Kemal Tunca iştirak ettiler.