Qırımtatar halqınıñ sürgünliginiñ 81 yıllığına azırlıq körüşüvi olıp keçti

18.04.2025

Çiçek ayınıñ 17-nde Qırımtatar halqınıñ genotsid fedalarını ve sürgünlikniñ 81 yıllığını añmaq içün hatıra tedbirleriniñ azırlanması ve keçirilmesi boyunca ortaq areketlerni idare etmek maqsadınen onlayn-toplaşuv olıp keçti.

Toplaşuvda Qırımtatar Milliy Meclisi, Ukrayina Prezidentiniñ Qırım Muhtar Cumhuriyetindeki Daimiy Temsilciligi, Ukrayinada ve onıñ tışında (meselâ, Türkiye, Bulğaristan, Poloniya, Almaniya, Felemenk, Litvaniya) faaliyet köstergen Qırımtatar cemaat teşkilâtlarınıñ vekilleri, Qırımtatar milliy areketiniñ faalcileri iştirak ettiler.

Toplaşuv iştirakçilerine Ukrayina devlet akimiyeti organları ve Qırımtatar Milliy Meclisi tarafından planlaştırılğan Qırımtatar halqınıñ genotsid fedalarınıñ hatıra kününe bağışlanğan bir sıra tedbirlerniñ azırlanuvı aqqında haber etildi. Tögerek masalar, sergiler, film numayışları, mitingler ve ilâhre planlaştırıla.

Farqlı bölgelerde teşkilât ve cemiyetlerni temsil etken toplaşuv iştirakçileri Qırımtatar halqınıñ genotsid fedalarınıñ hatıra kününe azırlanğan tedbirler aqqında haber ettiler, diger iştirakçilerni olarnıñ azırlanması ve ömürge keçirilmesinde işbirlikke davet ettiler.

İştirakçiler yerli akimiyet organları ya da çetelde yaşağan cemiyetler içün Ukrayina diplomatik müessiselerinen azırlıq meseleleriniñ idaresini devam ettirmek, em de bütün yazılı malzemelerde ve kütleviy haber vastalarında yekâne üslüpni qullanmaq aqqında añlaştılar.