Mecliste arap cemiyetleriniñ vekilleri içün iftar ötkerildi

28 March 2025

Saban ayınıñ 27-nde Qırımtatar Milliy Meclisinde iftar ötkerildi, oña Yaqın Şarqnıñ arap cemiyetleriniñ liderleri ve vekilleri, em de cemaat teşkilâtları ve arap asıllı jurnalistler davet etildi.

Körüşüvde Mısır, Suriye, Urdun, Filistin ve Livan cemiyetleriniñ vekilleri, haber vastalarınıñ, Ukrain kommunikatsiya ve dialog merkeziniñ ve Arap-ukrain iş şurasınıñ vekilleri çıqışta bulundılar. Yaqın Şarq memleketleriniñ vekilleri memleketlerindeki vaziyet aqqında tarif ettiler.

Qırımtatar Milliy Meclisiniñ reisi Refat Çubarov musafirlerge muracaat etip, Ukraina ögünde turğan meseleler aqqında aytıp, Ukraina ve diger devletlerniñ kelecegi oğrunda musulman cemiyetiniñ birleşmesiniñ müimligini qayd etti. O, qırımtatar mevzuları ve Qırım yarımadasınıñ işğali meselelerini halqara toplulıqnıñ diqqat merkezinde tutmaq müimligini de qayd etti.

Qırımtatar halqınıñ lideri Mustafa Cemilev ukrain cemiyetinde farqlı cemiyetler ve milletler arasında qonuşuv ve işbirlikniñ müimligini qayd etti. Suriye cemiyetiniñ reisi Muhammad Zayidiye, Mustafa Cemilevge, onıñ insan aqları ve serbestlik oğrunda küreşini tanıp, Azat Suriye bayrağınen şal bağışladı.

İftarda Qırımtatar Milliy Meclisiniñ reisiniñ muavini Nariman Celâl, Türkiyedeki Ukraina elçisi, Meclis azaları ve qırımtatar faalcileri de iştirak ettiler.