Kıyivde qadın iftarı olıp keçti

24 March 2025

Saban ayınıñ 22-nde Kıyivde Qırımtatar Milliy Meclisi ve “Qırım cebesi” Birleşken teşebbüsi qırımtatar qadınları içün ananeviy iftarnı keçirdiler. Bayramğa arbiy hadimlerniñ, elâk olğan Qaramanlar ve siyasiy mabüslerniñ anaları ve apayları, faalciler, ocalar, qadınlar, jurnalistler ve digerleri davet etildi.

Er bir musafir teşkilâtçılardan ukrain tiline tercime etilgen Quran ediye olaraq aldı.

İftarda “Serbest Qırımğa mektüpler” aktsiyasına qoşulıp, Rusiye tarafından qanunsız tutulğan Qırım siyasiy mabüslerine mektüpler yazmaq ve olarnıñ qorantalarına maddiy yardım etmek mümkün edi.

“Asker ve siyasiy mabüslerniñ acayip, istidatlı qadınları ve qaraman apaylarınen qonuştım. Er kesniñ ruhiy yarası bar – birisi aqayını cenkte ğayıp etti, birisi onı cebeden ya da apishaneden bekley, birisi tuvğanlarını çoq yıldır körmedi ve quçaqlap olamadı ve bunı endi yapıp olamaycaq, birisi tuvğan evi ve Vatanı içün keder ve añsağanlıq duya”, – dep sabıq siyasiy mabüs, Qırımtatar Milliy Meclisiniñ reisiniñ birinci muavini Nariman Celâlnıñ ömür arqadaşı Leviza Celâl yazdı.

O emin ki, qıyın vaqıtlarda tamam qadın – er şey yahşı olacağına işanç yolunı aydınlatqan çıraq ola. Amma er bir qadın, küreşmek içün küçü ve resurslarını yañıdan tiklemek kerek. Leviza hanumnıñ aytqanına köre, böyle tedbirler, biri-birine yaqınlaşmaq, diñlemek ve destek köstermek içün pek qıymetli ve kereklidir.

“İftarda “Serbest Qırımğa mektüpler” aktsiyasına qoşulğan, siyasiy mabüslerge qol tutuv mektüpleri yazğan ve muqaddes Ramadan ayında ihtisasiy tibbiy ve ruhiy yardımğa muhtac olğan siyasiy mabüslerniñ balaları içün para toplağan er keske minnetdarım”, – dep Leviza Celâl qoştı.