Ankarada “11 yıllıq Qırımnıñ Rusiye işğaline tirenüv” konferentsiyası olıp keçti

27 February 2025

Kiçik aynıñ 26-nde Ankaradaki Türkiye Cümnhuriyetiniñ Milliy kütüphanesinde “11 yıllıq Qırımnıñ Rusiye işğaline tirenüv” konferentsiyası olıp keçti. Kırım Dernekleri Genel Merkezi ve Ankaradaki Ukraina birliginiñ işdeşliginen tedbir teşkil etildi.

Ukraina işlerini vaqtınca eda etken Oleksiy Çernışev çıqışta bulunıp qayd etti ki, küçlü halqara destekke esaslanğan Ukrainanıñ maqsadı – vaqtınca işğal etilgen topraqlarda insanlarnıñ, şu cümleden Qırımnıñ tamır halqı olğan qırımtatarlarnıñ, aqlarını qorçalamaq ve Ukrainanıñ topraq bütünligini yañıdan tiklemektir.

Bundan ğayrı, konferentsiyada Qırımtatar Milliy Melcisiniñ azası Gayana Yüksel iştirak etip, öz çıqışında esas muqavemet vaqiaları ve yarımadadaki davalar vaziyetini qayd etti. 

“Halqara siyasette tiktonik deñişmeler olsa da, bizim işimiz bar: Qırımnı işğalden azat etmek içün çalışamız. 2014 senesi işğal nasıl başlanğanını hatırladım: halqara uquqnıñ qaba bozulması ve Ukraina toprağınıñ silâlı zapt etilmesinen. Arasında qırımtatar halqınıñ çoq vekili olğan faal ukrain vatandaşları, tam başlanğıçtan işğalli rejimge qarşılıq kötere ediler”, – dep Facebook saifesinde yazdı.

Meclis vekili, işğalli akimiyetniñ Qırımda insan aqlarınıñ bozuluvı, Qırımtatar Milliy Meclisiniñ faaliyetiniñ yasaq etilmesi, yüzlernen siyasiy mabüsler, Vatanını terk etmege mecbur olğan insanlar, ruslarnıñ işğalni aqlamağa tırışqanları teşviqiy mifler aqqında aytıp berdi.

“Qırımnı işğalden azat etmek içün küreş devam ete, ve o, Ukrainanıñ Rusiye istilâsına qarşı umumiy tirenüviniñ bir qısmıdır. Qırımtatarlar Ukraina Silâlı quvetleri erkânında cenkleşeler, göñüllilerge yardım eteler ve halqara seviyede aqiqat içün küreşeler. Bizim vazifemiz – dünyağa Qırımnı unutmağa imkân bermemektir”, – dep Gayana Yüksel yekünledi.