Refat Çubarovnıñ Qırımnıñ işğaline tirenüv kününe muracaatı

25 February 2025

Ukraina Prezidentiniñ Qırım Muhtar Cumhuriyetindeki Temsilciligi tarafından azırlanğan Qırımnıñ işğaline tirenüv kününe bağışlanğan video muracaatında Qırımtatar Milliy Meclisiniñ reisi Refat Çubarov, 11 yıl evelsi Rusiye Qırımnı işğal etip, Ukrainağa qarşı cinaiy cenk başlatqanını qayd etti:

“2014 senesi kiçik qış ayındaki o künlerde Qırımtatar Milliy Meclisi tarafından teşkil etilgen on biñlernen Qırım sakini Qırımnıñ işğalini toqtatmağa tırıştı. Amma o vaqıt küçümiz ve imkânlarımız yetmey edi.

11 uzun yıl devamında Qırımtatar halqı ve Qırımda yaşağan qavmiy ukrainler Rusiye işğalcileriniñ taqipleri ve repressiyalarından zarar kördiler. Rusiye barbarları içün Qırım, qırımtatar halqınıñ beşigi, qomşu memleketlerge ve olarnıñ halqlarına qarşı arbiy ekspansiya içün bir meydandır.

2022 senesi kiçik qış ayından soñ dünya siyasetçileri Rusiye tarafından global dünyağa telüke ketkenini añlasa da ve bir çoq memleket Ukraina etrafında birleşse de, ukrain milletiniñ birligi ve dayanıqlığı, ukrain arbiyleriniñ cesürligi, qırımtatar halqınıñ qırılmazlığı Qırımnıñ Rusiye işğalcilerinden azat etilmesi ve Ukraina devletiniñ Qırım üzerindeki suverenitetiniñ ğayrıdan tiklenmesiniñ kefaleti ola bile. Qırım Ukrainadır! Ukrainağa şan-şerefler!”