Kıyivde “Crimea” resimler sergisi taqdim etildi

21 February 2025

60 eserden ibaret olğan “Crimea” sergisi paytahttaki Octo.Galerie galereyasınıñ bir qaç qatında yerleşti ve toponimlerniñ ve Qırımnıñ aqiqiy tarihınıñ “qaytarılmasına” bağışlanğan sanatçılarnıñ eserlerini birleştirdi. Serginiñ açılışında çoqsaalı sanatçı Aziza Eskender de kontsert keçirdi.

“Bu, qırımtatar halqı ve onıñ tili aqqında sanattır. Sergi, Qırımnıñ şimdiki ve keçken vaziyetine, qaraylar, qırımçaqlar ve qırımtatarlarnıñ yaşamağa mecbur olğanlarına diqqat çeke. Farqlı devirlerde müstemlekecilik akimiyeti tamır halqlarınıñ izlerini silmege tırışıp, Qırım şeer ve köyleriniñ adlarını deñiştirgen edi. Bazı meskün yerlerge bugünge qadar saqlanıp qalğan eski yunan adları berildi. Daa soñra Şuralar Birligi bu ameliyatnı devam ettirip, ecnebiy “Çornomorske”, “Fruktove” ve “Kurğanne”, “Oktâbrske” kibi adlarnı berdi ve tek bazı adlar saqlanıp qaldı – olarnıñ arasında Bağçasaray, Canköy, Saq, Keriç”, – dep serginiñ anotatsiyasında qayd etildi.

Sergide öz eserlerini Qırımdaki repressiyalar mevzusına bağışlanğan Aziza Eskender, “Qırım dağları alâ daa tura” serlevalı resimlerinen ressam, dizayner ve qaray aktivisti Ezra Pastor, Qırımnıñ çeşit köşeleriniñ manzaralarınen Yuliya Kuçerenko, “Qara deñizim” serlevalı resimlerinen Anna Prıdatko, deñiz manzaralarınen Olğa Rusınçuk ve Qırım şeerlerini alternativ timsaller vastasınen temsil etken leyhanen Arseniy Çuğuy taqdim ettiler.

Sergini 2025 senesi saban ayınıñ 20-ne qadar ziyaret etmek mümkün: Meçnıkova soqağo, 5, Octo.Tower.

_____________________________________________________________________________

“Crimea” sergisiniñ açılışı ve Aziza Eskenderniñ kontsertiniñ yayını: