Varşavada Qırımnıñ işğaline muqavemet kününe bağışlanğan tedbir olıp keçti

21 February 2025

Kiçik aynıñ 20-nde Varşavada Qırımnıñ Rusiye tarafından işğaliniñ 11-nci yıllığına bağışlanğan tedbir olıp keçti. Anda, sanatçı Emine Ziyatdinova tarafından yapılğan ve işğal şartında qırımtatarlarnıñ yaşayışını qayd etken 26 resimden ibaret olğan “Qırım. Ev” fotosergisi ve “Qırım. Muqavemet” vesiqalı filmi taqdim etildi.

Tedbirniñ teşebbüsçisi Poloniyadaki Ukraina Elçihanesi ve Halil Halilovnıñ başlığınen “Qırım evi” oldılar. Ukraina Elçisi Vasıl Bondar, Poloniyada Bütündünya qırımtatarlar kongressiniñ vekili Nedim Useinov, Poloniya Cumhuriyetiniñ Seyminiñ mebusı, Seym eyyetiniñ tiş işleri reisi Pavel Koval, SGH rektorı Pötr Vahovâk ve Poloniya Cumhuriyetiniñ İlim ve yüksek tasil naziriniñ muavini Andjey Şeptıtskıy söz ayttılar. Kıyivden video bağı vastasınen Qırımtatar Milliy Meclisiniñ reisi Refat Çubarov ve Ukraina halq mebusı Tamila Taşeva da qoşuldılar.

Tedbir, Ukraina ve qırımtatar halqına deñiştirilmez destegini daa bir kere bildirgen diplomatlar, ükümetçiler, ilimler ve cemaat vekillerini birleştirdi.

Öz çıqışında Refat Çubarov qayd etti ki, 11 sene evel Rusiye Ukrainağa qarşı tecavuzını başlatqanda Qırımda qırımtatarlar, bu tecavuznı toqtatmaq içün er şey yapa ediler. Lâkin o zaman küçüni coyğan Ukraina devleti ve Rusiyeniñ qanunsız areketleri tarafından şaşırıp qalğan dünya işğalcilerge qarşılıq kösterip olamadı. Tamam bu, Donetsk ve Luğansk vilâyetlerinde cenkniñ başlanğıçınıñ sebebi oldı, 2022 senesi kiçik ayda ise Ukrainağa tolu miqyaslı tecavuznıñ sebebi oldı.

“11 senedir Qırımda qırımtatarlar ve qavmiy ukrainalılar işğal şartında yaşaylar, şimdi ise Zaporijjâ, Herson, Donetsk ve Luğansk vilâyetleriniñkiler de. Biz belley edik ki, bu vaqıt devamında vaziyet tamamınen deñiştiedi ve ortaqları yardımınen, bizim cesür ordumız yardımınen, insanlarnıñ qararlığı yardımınen şimdi Ukraina küçlü bir devlettir. Ve tecavuzcını barışıqqa mecbur etmek içün bütün şartlar bar olğan kibi körüne. Lâkin episini büyük telâşqa oğradı, çünki tecavuzcı devletnen ve halqara cinayetçi, biñlerce insanlarnı öldürgen başınen aytışmalarnı keçirmege tekilf etken siyasetçiler peyda ola”, – dep Meclisniñ lideri ayttı.

Bundan ğayrı, Refat Çubarov qayd etti ki, Qırım azat etilecegini bekley, çünki anda yüz biñlerce insan – Ukraina devletine sadıq olıp qalğan bütün qırımtatar halqı ve qavmiy ukrainler bar, 2022 senesi Rusiye tarafından zapt etilgen topraqlarnıñ sakinleri de bunı bekleyler.

“Biz olarnı varvar rusiye devletiniñ esirliginde qaldırıp olamaymız. Böyle olmaz! Bu bizim insanlarmız! Kimse Ukraina, ukrainalılar, qırımtatarlar yerine qarar etmez! Men eminim ki, barışıqnıñ adalet ve BMniñ qurğanı printsipler esasında olması içün epimiz beraber elimizden kelgenni yapacaqmız”.

İştirakçilerge muracaat etkende Ukraina Elçisi Vasıl Bondar qayd etti ki, bugün Qırım tecavuz içün arbiy baza olaraq qullanıla ve insan aqlarınıñ bozuluvınıñ esas yeridir.

“Onı işğalden azat etmek – tek Ukrainanıñ suvereniteti meselesi degil, Avropada kerekli istiqrar teminatçılarından da biridir. Ukraina Qırımnıñ reintegratsiyasına, adaletni ğayrıdan tiklemege ve tamır halqlarınıñ aqlarını qorçalamağa faal sürette azırlanıla. Dünya birleşken olıp qalmalı ve iç bir şeyge baqmadan, devletimizni destek etmeli, çünki Qırımnıñ qaytarılması – barışıq ve havfsızlıq anahtarıdır”, – dep Elçi ayttı.