İş çerçivesinde Meclisniñ reisi ve müfti İndoneziya ziyaret ettiler

17 December 2024

Qırımtatar Milliy Meclisiniñ reisi Refat Çubarov ve Qırım Muhtar Cumhuriyetiniñ diniy idaresiniñ müftisi Ayder Rustemov bir aftalıq ziyaretnen İndoneziyada bulunalar. Ziyaret çerçivesinde qırımtatar delegatsiyasınıñ İndoneziya diniy ve tasil teşkilâtlarınıñ vekillerinen bir sıra körüşüvleri olıp keçti.

Hususan, ziyaret vaqtında Refat Çubarov ve Ayder Rustemov fahriy musafir olaraq İndoneziya 2024 Meclisiniñ IV Milliy iş oturışında iştirak ettiler. Bu oturış, insanlıq, milliy birlik, adalet ve abadanlıq kibi meselelerni muzakere etmek içün bağışlanğan.

Bundan ğayrı, Meclisniñ reisi ve müfti MAARIF House aylıq munaqaşaları çerçivesinde açıq munaqaşağa qoşuldılar. Anda qırımtatar halqına qol tutuv meseleleri, dünyada vaziyet ve Ukrainağa halqara birdemlik aspektleri muzakere etildi. “Ukraina ve İndoneziya arasında bağlarnı pekitmek, Rusiye istilâsı şaraitinde Ukraina ögünde turğan esas meseleler aqqında añlaşılmasını arttırmaq içün daa bir adım atıldı. Körüşüvniñ neticesinde Ukraina ve Maarif İnstitutı arasında dialog ve işbirlikni devam etmege añlaştılar”, – dep İndoneziyadaki Ukraina elçihanesi qayd etti.

Bundan da başqa, Foreign Policy Community of Indonesianıñ tesisçisi ve reisi Dino Patti Calâl ile körüşüv oldı. Halqara işbirlikniñ aktual meseleleri, qırımtatar halqına global destek, Ukraina ve dünya ögünde turğan meseleler, em de işbirlikniñ istiqballeri, hususan akademik saada muzakere etildi.

Refat Çubarov ve Ayder Rustamov, Muhammedlikniñ Merkeziy reberliginiñ (İndoneziyanıñ islâm cemaat teşkilâtı) halqara işbirlik boyunca başı Şyafig A. Mugni ile ve Muhammedlikniñ Merkeziy reberliginiñ halqara munasebetler ve işbirlik bölüginiñ vekili Bunyan Saptomo ile körüştiler. Körüşüv vaqtında Refat Çubarov ve Ayder Rustemov Muhammedlik azalarını Ukrainağa kelmege davet ettiler, em de onlayn ve oflayn şekillerde kelecekte işbirlik yapmağa teklif ettiler. Aynı zamanda Muhammedlik vekilleri Ukraina musulmanlarına, şu cümleden Qırımtatar Milliy Meclisiniñ azalarına taziye bildirdiler. Qırım ve qırımtatarlar ve umumen ukrainler içün adaletli barışıqnıñ tiklenüvi içün ümütlerini bildirdiler.

Diniy işler merkeziy idaresiniñ Ofisiniñ müdirinen körüşüvde Müfti Ayder Rustemov İndoneziya musulmanlarınıñ sesini Ukraina musulmanlarına, hususan Qırım musulmanlarına duymaq müim olğanını ayttı. Refat Çubarov qırımtatarlarnıñ topraq aqqı içün küreşiniñ tarihını paylaştı ve bu yolnı İndoneziya halqınıñ mustaqillik küreşine beñzetti. Ului Abşar Abhalla qırımtatar halqına qol tutqanını ve Ukrainada adaletli barışıqnıñ tiklenmesine ümüt etkenini bildirdi.
Foto: Embassy of Ukraine in the Republic of Indonesia