64 yaşındaki siyasiy mabüs Servet Gaziyevniñ sağlıq alı qalp krizinden soñ fenalaşıp tura

29 Noyabr 2024

Qanunsız olaraq 13 senege apiske alınğan siyasiy mabüs Servet Gaziyevniñ sağlıq vaziyeti fenalaşa. “Hizb ut-Tahrir” davasıniñ ekinci Aqmescit gruppasınıñ mabüsi koordinatsiya bozuluvı ve sağ qolunda duyulğan ağrıdan şikâyet etti.

Qırım birdemligine yaqında onen telefon vastasınen laf etken siyasiy mabüsniñ qardaşı Svitlana Ablâmitova bu aqqında haber etti.

“Şimdi onıñ sağ qolunda ağrı bar ve koordinatsiya bozuldı — parmaqları areket etmeyler, qalemni tutıp olamay. Onıñ içekler meseleleri peyda oldı”, — dep tarif etti siyasiy mabüsniñ soy-sopı.

Yaqın kelecekte Servet Gaziyevni apishaneden müstemlekege etap etecekler.

2021 senesi Rostov-na-Donu SİZOda siyasiy mabüs Servet Gaziyev mikroinsultnı yaşadı. Bundan soñ yüzüniñ sağ tarafı felç oldı. Kerekli tibbiy yardım kösterilmedi, bir qaç kün soñra onı apishanege alıp kettiler, anda o, maneviy ve bedeniy basqığa oğradı. Advokat Emil Kurbedinovnıñ qayd etkenine köre, hastahanede onıñ belkemigine zarar ketirildi, bu ise Servet Gaziyevniñ sağlığını fenalaştırdı.

Hatırlatamız ki, 2019 senesi saban ayında Rusiye quvetçileri Qırımda kütleviy tintüvler keçirip, Rusiyede ve işğal etilgen Qırımda yasaq etilgen “Hizb ut-Tahrir” teşkilâtında iştirak etkeninde qabaatlanğan 24 erkekni tuttılar. Servet Gaziyev 2019 senesi saban ayınıñ 27-nde bu dava çerçivesinde sebepsiz qabaatlavlarnen apiske alındı.

2023 senesi qara qış ayında Cenübiy bölgeniñ arbiy makemesi “Hizb ut-Tahrir”niñ ekinci Aqmescit gruppasınıñ cinaiy davası çerçivesinde qabaatlav qararını qabul etti. Qırımtatarlar Ali Karimov, Seyran Murtazi, Erfan Osmanov, Cemil Ğafarov ve Servet Gaziyev 13 senege azatlıqtan marum etildiler.