Refat Çubarov «CRIMEA GLOBAL» halqara konferentsiyasında çıqışta bulundı

24 Noyabr 2024

Qırımtatar halqı içün bugün esas çağıruv – 240 yıl devamında qırımtatar halqını sistematik şekilde yoq etken Rusiye duşmanınıñ onıñ toprağını zapt etmesidir.

Bunı Qırımtatar Milliy Meclisiniñ reisi Refat Çubarov Qırım Globa. lUnderstanding Ukraine through the South (“Qırım global: Ukrainanı Cenüp vastasınen añlama”) konferentsiyasında qayd etti”, – dep haber etti Ukrinform.

“Bugün qırımtatar halqı içün eñ büyük çağıruv – 240 yıl devamında qırımtatar halqını sistematik şekilde yoq etken Rusiye duşmanınıñ onıñ toprağını zapt etmesidir. Eñ büyük mesele – toprağımıznıñ zapt etilmesidir, ve bu bizni ğayıp etüvge alıp kete”, – dedi o.

Ukrainada qırımtatarlarnıñ aqlarınen bağlı vaziyetke kelgende, Çubarov qayd etti ki, Rusiyeniñ Ukrainağa qarşı cenki ukrain cemiyetiniñ Ukrainanıñ tamır halqlarınen bağlı meselelerni ve, ilk evelâ, aman-aman yarım asır devamında sürgünlik yerlerinde, öz toprağı tışında zorbalıqnen tutulğan tamır qırımtatar halqınıñ aqlarını ğayrıdan tiklemek kerekligi aqqında añlamını tezleştirdi.

“Qırımtatar halqınıñ aq-uquqlarını ğayrıdan tiklevniñ emiyeti ve kerekligi qabul etilmegen bir devir oldı, ve tek 2014 senesi saban ayınıñ 20-nde, Qırım işğal etilgen ve “referendum” keçirilgen soñ, Ukraina Yuqarı Şurası tamır qırımtatar halqınıñ öz toprağında, Ukraina devletiniñ qısmı olaraq, aqlarını kefil etken mahsus qarar qabul etti, Qırımtatar halqınıñ Meclisini qırımtatar halqınıñ vekilleri tarafından saylanğan temsiliy organ olaraq tanıdı, ve Yuqarı Şura devlet adından tamır halqlarınıñ aqları boyunca BMniñ deklaratsiyasına qoşulğanını bildirdi. Ve bundan soñ Ukrainada qırımtatar halqınıñ aqlarını ğayrıdan tiklev boyunca sistemli iş başlandı”, – dep qayd etti o.

Çubarov hatırlattı ki, 2021 senesi “Ukrainanıñ tamır halqları aqqında” qanunı qabul etildi, amma Mecliske qırımtatar halqınıñ temsil organı olaraq uquqiy status berilmesi boyunca Ukraina ükümetinen muzakereler devam ete.

“Bu vaqıtqa qadar Ukraina ükümetinen Qırımtatar Milliy Meclisine tamır qırımtatar halqınıñ temsiliy organı statusınıñ berilmesi boyunca munaqaşalar devam ete. Bu qabul etilmez”, – dep qayd etti Meclisniñ reisi.

O şunı da qayd etti ki, Ukrainada, er bir devlette kibi, qanunnıñ qabul etilmesi ve amelge keçirilmesi arasında belli bir vaqıt keçe, qabul etilgen qanunnıñ amelge keçirilmesi çeşit sebeplerden qıyınlaşa.

“Amma aynı zamanda, men obyektiv olmağa isteyim, tamır halqları qanunı tarqalğan saalarda daima iş alıp barıla, icra ve devlet akimiyetiniñ organlarınen işbirlik alıp barıla. Kelecek adımlarımız ve olarnı nasıl al etecegimiz aqqında muzakere etemiz”, – dep qoştı Çubarov.

O, 2025 senesi Birleşken Milletlerniñ tamır halqları meseleleri daimiy forumınıñ 24-ünci sessiyası keçirilecek, anda devletler tamır halqlarınen bağlı mecburiyetleriniñ yerine ketirilmesi, hususan olarnıñ aqlarınıñ yerine ketirilmesi aqqında esabat berecek, dep bildirdi.