Türkiyede qırımtatarlarnıñ mecburiy köçmesi aqqında kitap taqdim etildi

06 Noyabr 2024

_{Foto kirimvakfi.org.tr}

Ankarada (Türkiye) eki cian cenki arasında qırımtatar halqınıñ mecburiy migratsiyası aqqında araştırma kitabı taqdim etildi.

Ukrinform bu aqqında haber berdi.

“Qırımtatar diasporası bütün dünyada yaşay, ve bu kitapta tarif etilgen biñlernen ikâye bar. Litvaniyada qırımtatarlarnıñ bu memlekette yaşağanı aqqında kitap neşir etilecek. Qırımtatarlarnıñ Vatanında yaşağanları aqqında çoq şey bilemiz ve daa çoq şey belli olacaq, – o halqnıñ neler yaşamağa mecbur olğanı aqqındadır”, – dep ayttı kitap taqdiminde Türkiyedeki Ukraina elçisi Vasıl Bodnar.

Diplomatnıñ qayd etkenine köre, kitapta bugünki adiselernen tarihiy paralleller bar, çünki o vaqıt, bugünki kibi, qırımtatarlar ruslarnıñ telükesi sebebinden başqa memleketlerge köçken ediler. Bundan ğayrı, eki cian cenki arasında Romaniyada qurulğan qırımtatar cemiyetleri ve birleşmeleriniñ bir qısmı soñra Türkiyede faaliyetini devam ettirdi, anda eñ büyük qırımtatar cemiyetlerinden biri yaşay.

“Bir kere Dobrujda: eki cian cenki arasında qırımtatarlarnıñ köçmesi” kitabı YTB ve “Qırım vaqfı” cemaat teşkilâtınıñ yardımınen neşir etildi.

“1783 senesi Rusiye Qırım hanlığını zapt etken soñ, bir asırdan ziyade devam etken kütleviy köçüvler başlandı, bu mecburiy köçüvler neticesinde qırımtatarlar Osmanlı İmperatorlığınıñ farqlı bölgelerine yerleştiler… Bütün qıyınlıqlarğa baqmadan, olar öz kimligi ve medeniyetini saqlap qaldılar”, – dep ayttı Qırım vaqfınıñ reisi Tunçer Kalkay serginiñ açılışında.

Kitapnıñ taqdim merasimi ve fotoresim sergisiniñ açılışında Türkiye parlamentiniñ, ecnebiy türklerniñ işleri boyunca prezidentlikniñ ve olarnen bağlı cemiyetlerniñ, Qırım vaqfınıñ vekilleri, Ankarada akkreditatsiya etilgen çetel devletlerniñ elçihaneleriniñ vekilleri ve elçileri, Ankara paytahtı bölgesiniñ akimiyet vekilleri, qırımtatar cemiyet ve teşkilâtlarınıñ reberleri iştirak ettiler.