Nariman Celâl Varşavada OSCE konferentsiyasında çıqışta bulundı

01 Oktâbr 2024

Meclisniñ reisiniñ birinci muavini çıqışta bulunıp, Qırımda endi 11-inci yıl içinde olğan vaziyetni añlağan pek çoq insan qalğanını ayttı. Olar öz qanuniy demokratik aqları ve serbestliklerini qullanmağa isteyler, lâkin bular sıñırlandı.

Nariman Celâl, Rusiye işğalci akimiyeti sebebinden Qırım sakinleriniñ aqları ve söz serbestligi sıñırlanğanını qayd etti.

“Yazıq ki, işğal etilgen topraqlarda, hususan, Qırımda, aman-aman bütün Ukraina vatandaşları Rusiye akimiyetiniñ reineleri qalalar”, – dep qayd etti Nariman Celâl.

Onıñ aytqanına köre, zapt etilgen topraqlarda rusiyeliler işğalge qarşı çıqqan er kesni taqip eteler. Ve bugün Kremlniñ esirleriniñ sayısı 200-ge yetti.

QIRIM.News haber etkenine köre, basqı ve taqipke oğrağan, amma işğalcilerden qorqıp, bunı bildirmegen insanlar da bar.

“Apishanede qalğan insanlarnı azat etmek pek qıyın. Soñki beş sene içinde tek bir qaç kişi azat etildi. Qırımdan siyasiy mabüsler arasında azat etilgen tek insan men oldım”, – dep qayd etti o.

Celâl hatırlattı ki, apiske alınğanına qadar işğal etilgen Qırımda Qırımtatar Milliy Meclisiniñ reberliginiñ tek vekili edi.

O, onı 2021 senesi berim ayınıñ başında, Rusiyeniñ Ukraina toprağınıñ işğaline qarşı çıqqanı ve red etkenine dair açıq nazar noqtası içün tutıp alğanlarını ayttı. “Qırım platforması” sammitinde iştirak etkeni ve OSCE tedbirlerine barğanı içün.

“Tabiiy ki, Rusiye akimiyeti bunı bağışlamadı. 2021 senesi berim ayınıñ başında beş kişi tutuldı, şu cümleden men de. Aramızda beden işkencesine oğrağanlar da bar. Ve bunı makemede bildirdiler. Olarnı urdılar, elektriknen taqip ettiler, öldürmege qorquzdılar, balalarını, yaqınlarını, soy-soplarını öldürmege qorquzdılar. Bu sebepten olar özlerine ve bir-birlerine iftira atmağa mecbur oldılar”, – dedi Celâl.

O şunı da bildirdi ki, bir qaç künden soñ siyasiy mabüslerge mustaqil advokatlar kelgende, olar evelki şaatlıqlarını red ettiler. Faqat Kreml kontrolindeki makeme bu deñişmelerni red etip, qırımlılar cezasız qalmağa tırışqanını bildirdi.