Azat etilgen siyasiy mabüs Leniye Umerova Meclisni ziyaret etti

30 Sentâbr 2024

Sabıq siyasiy mabüs Leniye Umerova Rusiye esirliginden azat etilgeni içün onı şahsen hayırlağan Meclisniñ azalarınen körüşti.

“Körüşüvde siyasiy sebeplerden Rusiye tarafından apiske alınğan 218 siyasiy mabüs olğan Qırım sakinlerine qol tutuv yolları da muzakere etildi”, — dep qayd etti Meclisniñ reisi Refat Çubarov.

Azat etilgen soñ Umerova kiçik reabilitatsiya kursını keçti. O, Meclisniñ azalarına er taraflama qol tutqanları içün teşekkürler bildirdi. Meclisniñ temsilcileri onıñ printsipial noqta-i nazarını qayd etip, şimdi işğalciler tarafından esir alınğan mabüslerniñ seslerinden biri olmağa çağırdılar.