Meclisiniñ Prezidiumınıñ Lehistan tış işleri naziriniñ sözlerine dair beyanatı

19 Sentâbr 2024

Lehistan tış işleri naziri Radoslav Sikorskıy halq ögünde çıqışta bulunıp ayttı ki, rusiyeniñ Ukrainağa cenkini bitirmek içün bizim devletimiz Qırımnı bermek kerek.

Lehistan diplomatınıñ sözleriniñ başqa manasını tapmaq mümkün degil.

Hususan, o, Qırım yarımadasını “qanuniy sakinler kim olğanı teşkerilecek soñ, adaletli referendumnı azırlamaq içün Birleşken Milletler Teşkilâtınıñ vekâletli missiyasınen” bermege teklif ete.

Qırımtatar Milliy Meclisi böyle beyanatlarnı qabul etilmez ve tsinik, dep saya. Ukraina milliy menfaatlarına ya da Ukrainanıñ tamır qırımtatar halqınıñ aqları ve menfaatlarına qarşı kelgen, dep saya.

Ukraina milliy qanunlarına ve halqara uquqqa binaen, Qırımnıñ “qanuniy sakinleri” tek Ukraina vatandaşları ve Ukraina qanunlarına köre, Ukraina toprağında daimiy ya da vaqtınca bulunğan şahıslardır. Bu sebepten Ukrainanıñ Qırımda yaşağan şahısnıñ qanuniyligini belgilemek içün yapılğan ve yapıla bilecek er angi başqa ıntıluvlar kerekmey ve maqsatsızdır.

Eminmiz ki, rusiyeniñ Ukrainağa qarşı cenkini bitirmek, Ukrainada barışıqqa irişmek, topraq bütünliginiñ ğayrıdan tiklenmesi, işğal etilgen topraqlarda Ukraina vatandaşlarınıñ bozulğan aqları ve serbestliginiñ ğayrıdan tiklenmesi meselesini çezmek içün teklifler Ukraina milliy qanunları ve halqara uquqı esasında olmalı.

Qırım – Ukrainanıñ vaqtınca işğal etilgen toprağıdır ve barışıqnıñ ilk adımı yarımadadan Rusiye işğalli ordularınıñ çıqarılması olmalı.

Qırımnıñ keleceginen bağlı meseleler tek Ukraina devleti ve tamır qırımtatar halqınıñ iştiragi ve razılığınen muzakere etilmeli.

Refat Çubarov

Qırımtatar Milliy Meclisiniñ reisi

2024 senesi berim ayınıñ 19-ı

Kıyiv şeeri