Zelenskıy vatandaşlarımıznı azat etmege niyetlene — Celâl Leniye Umerovanıñ azat etilmesi aqqında

17 Sentâbr 2024

Leniye Umerovanıñ azat etilmesi Ukraina prezidenti Volodımır Zelenskıynıñ cenk esirlerini degil de, vatandaşlarımıznı azat etmek niyetine sadıq olğanını tasdıqlay.

Qırımtatar Milliy Meclisiniñ reisiniñ birinci muavini Nariman Celâl Leniye Umerovanıñ azat etilüvini QIRIM.News içün açıqladı.

Onıñ qayd etkenine köre, cenk esirlerinden farqlı olaraq, vatandaşlarnı azat etüv ceryanı uquqiy mehanizmlernen idare etilmey, amma devletniñ yolbaşçısı siyasiy mabüslerni de unutmay.

• Bugün azat etilgen 49 vatandaşımız içün quvanam. Hususan Leniye içün sevindim, çünki o menim semetdeşimdir. Bu güzel qız, qorquzuvlarğa baqmadan, apiske alınğanda bile, işkence yapıcılar ögünde öz vatandaşlıq nazar noqtasını “Slava Ukraini!” qısqa cümlesinen bildirdi. Bu maña halqımnıñ, Ukrainanıñ tamır halqınıñ temsilcisi olğan qızlarnen ğururlanmağa imkân bere, — dep Celâl qayd etti.