Kıyivde Volodımır Zelenskıy Qırımtatar halqınıñ genotsid fedalarınıñ hatıra abidesini açtı

11 Sentâbr 2024

Kıyivde qırımtatar halqınıñ genotsid fedalarınıñ hatırasına memorial açıldı. Tedbir Qırım platformasınıñ dörtünci sammitiniñ arfesinde olıp keçti.

Hatıra abidesiniñ açılış merasiminde Ukraina prezidenti Volodımır Zelenskıy qayd etti ki, Rusiye qırımtatar halqınıñ genotsidi vaqtındaki cinayetlerini tekrarlamağa tırışa.

• Bugün qardaşlarımız: qırımtatarlar, ukrainler, faaller, bütün cesür insanlar – Rusiye apishanelerinde aqiqatnı aytqanları, işğalcige boysunmağanları içün oturalar. Leniye Umerova, Server Mustafayev, Aziz ve Asan Ahtemov ağa-qardaşları ve daa yüzlernen başqa sürgün etilgen soyları kene de taqip etile. Amma işğalciler 1944 senesi sürgün etilgenlerni qırmağanı kibi, bizni de qıramazlar, – dep qayd etti Ukraina Prezidenti.

Tedbirde qırımtatar halqınıñ lideri Mustafa Cemilev çıqışta bulunıp, Qırımnıñ Rusiye tarafından işğalinden soñ qırımtatar halqınıñ tarihınıñ facialı saifeleri tekrarlana, dep qayd etti.

• Yañı basqılar, insanlarnıñ hırsızlanması, yüzlernen apiske alınuv, apishanelerde işkence, öz memleketine qarşı cenkleşmege mecbur etüv, Ukrainanıñ tamır halqınıñ basqısı ve Qırımnıñ kene de ruslar tarafından işğal etilmesi. Rusiyeniñ reberleri deñişe, amma esası deñişmey. Şunıñ içün bu hatıra, tek “Rusiye barışığı”nıñ dehşetini hatırlamaq içün degil de, qomşumıznen beraber yaşamağa mecbur olğanımıznı hatırlatmaq içün de bar, — dep qırımtatar halqınıñ lideri Mustafa Cemilev ayttı.

Qırımtatar halqınıñ genotsid fedalarını añmaq içün abideniñ açılışı Ukraina Prezidentiniñ teşebbüsinen ötken sene mayıs 18-de ilân etilgen edi. 2024 senesi aynı şu künü, Qırımtatar halqınıñ genotsid fedalarını añma kününde, Kıyivde Qırımtatar halqınıñ genotsid fedalarını añmaq içün kelecekteki abidege taş qoyulması tantanalı şekilde keçirildi.