Büyük Britaniya elçisi Qırım odasını açtı (foto)

04 Sentâbr 2024

Ukrainadaki Büyük Britaniya elçisi Martin Garris öz rezidentsiyasında Birleşken Qırallıqnıñ Qırımnen alâqaları, qırımtatarlarnıñ tarihı ve medeniyetine bağışlanğan oda açtı.

• Oda, şu cümleden Qırım cenki vaqtında Büyük Britaniyanıñ yarımadanen tarihiy alâqalarını numayış ete, ve Ukrainanıñ topraq bütünligine qol tutqanını qayd ete, çünki Qırım – Ukrainadır. Odanıñ maqsadı qırımtatarlarnıñ medeniyetini ürmet etmektir, – dep Britaniya elçihanesinde qayd ettiler.

Odada qırımtatar ustalarınıñ ananeviy maden, keramika ve qumaş eşyaları, em de Qırım cenki zamanınıñ aqiqiy medalleri bar. Büyük Britaniya elçihanesi Qırımtatar artefaktlarını, yarımadada qırımtatarlarnıñ zengin ve eski medeniyetini numayış etmek içün mahsus satın aldı.