Qırımda qanunsız olaraq bulunğanlar acelen o yerden çıqmalılar – Bouquet Kyiv Stage festivalinde Refat Çubarov

20 Avgust 2024

“Kıyiv Sofiyası” milliy qoruğınıñ toprağında VII. Bouquet Kyiv Stage halqara yüksek sanat festivali olıp keçti.

Qırım sanasında böyle vaqialar oldı:

– “Cenkke qadar yol” foto sergisi;

– “Qırım kimligi” milliy urba, yaraştırma ve resim sanatı sergisi;

– “Qırım: siyasiy ve medeniy ihtiyac” panel munaqaşaları

– Usein Bekirov kvartetiniñ caz kontserti.

Muzakerede Meclisniñ reisi Refat Çubarov, Meclisniñ reisiniñ birinci muavini Nariman Celâl ve Ukraina Prezidentiniñ Qırım Muhtar Cumhuriyetindeki Daimiy Temsilcisi Tamila Taşeva iştirak ettiler.

Muzakere esnasında Rusiye tarafından işğal etilgen Qırımda qanunsız olaraq yaşağan aman-aman bir million insannen bağlı meseleler köterildi.

– 2014 senesi kiçik aynıñ 27-nden (Rusiye Avropa makemesiniñ qararına binaen Qırım toprağını nezaret etken kün) işğal etilgen Qırımda yerleşken bütün ecnebiyler ve vatandaşlığı olmağan şahıslar yarımadanı acelen terk etmeliler. Qırımnı terk etmegenler Ukraina toprağında qanunsız bulunğan şahıslar olaraq sürgün etilmeliler, – dep Refat Çubarov qayd etti.

Meclisniñ reisiniñ sözlerine köre, 2014 senesi kiçik aynıñ 27-de Qırımda qanuniy olaraq yaşağan bütün vatandaşlar Ukraina vatandaşlarıdır. Qırım Muhtar Cumhuriyeti ve Aqyar şeeriniñ suvereniteti ğayrıdan tiklenecek soñ, olarnıñ Ukraina devletinen bütün munasebetleri Ukraina qanunları esasında alıp barılmalı. Ukrainanıñ işğal etilgen topraqlarınıñ sakinlerine nisbeten “cinayet yaptı – qanunğa köre mesüliyet çeke” printsipinen bir sırada amnistiya ve lustratsiya tedbirleri qullanılmalı. Elbette, bu tedbirler ağır cinayetlerni, şu cümleden Ukraina milliy havfsızlığı esaslarına qarşı cinayetlerni yapqanlarğa qarşı qullanılamaz.

Aynı zamanda Nariman Celâl qayd etti ki, eger Ukraina mustaqil avropa ülkesi olmağa istese, işğalniñ ilk kününden ukrain Qırımında yaşaycaqlarına ümüt etken insanları ve Qırımnı berip olmaz.