Kursk operatsiyası – Qırımnıñ azat etilmesiniñ repetitsiyası. Nariman Celâlnıñ “Amerikanıñ sesi”ne intervyusı

15 Avgust 2024

Kursk vilâyetindeki uruşlar, Ukraina Silâlı Quvetlerniñ başqa areketleri kibi, Ukraina devletiniñ topraq bütünliginiñ ğayrıdan tiklenüvi, şu cümleden, işğal etilgen topraqlarnıñ azat etilüvi, tek maqsatqa irişmege doğrultılğan. Qırımtatar Milliy Meclisiniñ reisiniñ birinci muavini Nariman Celâl Amerikanıñ sesine bergen intervyusında bunı ayttı.

“Menimce, ukrain arbiy ve siyasiy yolbaşçılığı, Rusiye Federatsiyasınıñ toprağına ücüm etüv kibi beklenilmegen ve standart olmağan adım atmağa qarar aldı, – dey Celâl. – Ve bu, neticede, Rusiye yolbaşçılığınıñ bu kibi adiselerge azır olmağanını kösterdi”.

Qırımnıñ azat etilüvinen bağlı repetitsiya

Ukraina Silâlı Quvetleri içün Kursk ameliyatınıñ emiyeti aqqında Celâl bunı ayttı:

“Er bir arbiy operatsiyada silâlı quvetler belli bir cenk tecribesini qazanalar, strategiyalarnı işleyler ve, tabiiy ki, şimdi Kursk vilâyetinde keçirilgen operatsiya, menimce, em arbiy, em de siyasiy taktik ve strategiyalarnıñ sınavıdır”.

Bundan da ğayrı, Ukraina ve halqara cemaat içün emiyetinden ğayrı, Kursk operatsiyası “Kremlge pek ciddiy bir signal berir ki, bütün mudafaa vastaları çalışmay, dünya sabırını coyıp, Rusiyeni halqara uquqqa uymağa mecbur etmek içün daa ciddiy ve sert areket etmege azır”.