Nariman Celâl Bundestagnıñ vitse prezidenti Katrin Ğerinğ-Ekardtnen körüşti

05 Avgust 2024

_{Fotoresim: Ukraina Prezidentiniñ Qırım Muhtar Cumhuriyetiniñ Temsilciligi}

Qırımtatar Milliy Meclisiniñ reisiniñ birinci muavini Nariman Celâl Almaniyadaki Bundestagınıñ vitse prezidenti Katrin Ğerinğ-Ekardtnen onlayn körüşüv keçirdi.

Ketrin Ğerinğ-Ekardt, qanunsız olaraqapiske alınğan vaqıt, Celâlnıñ mentorı edi. O, Narimannıñ azat etilüvini qayd ete, qorantasınen bağ tuta, onıñ vaziyeti aqqında içtimaiy ağlarda yazğan edi ve oña qoltutuv mektüpleri yollağan edi.

Nariman Celâl, ukrain siyasiy mabüsleriniñ Rusiye esirliginden azat etilmesine köstergen açıq destegi ve ğayretleri içün Katrin hanımğa teşekkürler bildirdi:

– Mektübiñizni aldım, ve bunı dayanmağa devam etmege büyük küç berdi. Tek maña degil, Ukrainağa onıñ serbestlik içün küreşinde qol tutqanıñız içün teşekkürler bildirem, – dedi Celâl.

Almaniyadaki Bundestagnıñ vitse prezidenti Nariman Celâlğa rus rejimine qarşılıq köstergeni ve ağır şaraitte küreşkeni ve cesür olğanı içün teşekkür bildirdi. O, Rusiyege qarşı sanktsiyalarnıñ saqlap qalmasına ve arttırılmasına qol tutqanını ve Almaniya Ukrainağa qol tutmağa ve mabüslerniñ azat etilmesi içün küreşmege devam etecegini qayd etti:

– Ukrainağa qol tutmağa devam etecekmiz, çünki Ukrainada tınçlıq ve telükesizlik er birimiz içün serbestlik ve adalet demektir, – dep Bundestagnıñ vitse prezidenti Katrin Ğering-Ekardt bildirdi.

Qırımtatar Milliy Meclisiniñ reisiniñ birinci muavini, azatlıq ve demokratiya içün küreşni devam ettirmek müim olğanını qayd etip, Katrinağa başqa qırım siyasiy mabüsleriniñ azat etilmesi içün işbirlikni devam etmek teklifini bildirdi.