Cenkni bitirmeyip toqtatmaq qırımtatarlarnı yoq etmek demektir — Cemilev

17 Iyül 2024

_{Foto: Kırım Haber Ajansı}

Qırımtatar halqınıñ lideriniñ fikrine köre, tek rus tecavuzcıları işğal etilgen topraqlardan ketecek soñ aytışmalar keçirmek mümkün olur. Türkiyege iş ziyareti vaqtında Mustafa Cemilev bu aqqında haber berdi.

QIRIM.News agentliginiñ türk haber agentliginiñ bildirgeni kibi, Cemilev prezident Recep Tayyip Erdoğannıñ baş mesleatçısı Yalçın Topçunen körüşti.

Bundan ğayrı, körüşücde “Adalet ve inkişaf fırqası”nıñ mebusları Süleyman Şahan, Türkiye-Moldova Parlamentlerarası dostluq gruppasınıñ başı ve milliy mudafaa meseleleri parlament eyyetiniñ azası Feyzi Berdibek, milliy mudafaa meseleleri parlament eyyetiniñ kâtibi Mehmet Ali Çelebi, ilimler doktorı Hale Şıvgın, Qurultaynıñ vekili Şevket Usmanov ve Kırım Haber Ajansınıñ reberi Esma Kasar iştirak ettiler.

Yalçın Topçu inandırdı ki, Türkiye qırımtatarlar, Qırımda yaşağanlar ve işğalden soñ vatanını terk etmege mecbur qalğanlarnıñ aqlarını qorçalamağa devam etecek.

Aynı zamanda Mustafa Cemilev hatırlattı ki, tahminen 50 biñ qırımtatar Qırım yardımadasını terk etti. Bu, Qırımda yaşağan qırımtatar halqınıñ 17%-idir.

O qayd etti ki, yaqın kelecekte Qırım işğalden azat etilmese, qırımtatarlar öz kimligini coyarlar.

“Bunıñ içün devam etken cenk, bizim cenkimizdir. Mümkün olğance Ukrainağa qol tutmağa tırışamız”, – dep qayd etti o.

Mustafa Cemilev, çatışmanı bitirmeyip toqtatuv aqqında çağıruvlarnı añlatqanda, bunıñ telükeli taraflarını ayttı.

“Bu cenk bitimese ve rus askerleri şimdiki mevamlarında qalsalar, bizim halqımız yoq olur. Biz buña qarşımız. Bizim şaraitimiz (cenkniñ bitirilmesi), halqara qaideler ve BMTnıñ nizamnamesine uyğun. Tecavuzcılar, işğal etilgen topraqlarnı terk etecek soñ aytışmalarnı keçire bilirmiz”, – dep Mustafa Cemilev qoştı.