“Kerçek bir bayram” – siyasiy mabüs Ziza Celâlnıñ azat etilmesi aqqında

08 Iyül 2024

İşğalciler tarafından 15 sene apis cezasına maküm etilgen Kezlevli qırım ressamı ve faalcisi Boğdan Ziza öz qız qardaşı Oleksandra Barkovağa mektüp yazdı.

Mında o, Meclisniñ reisiniñ birinci muavini Nariman Celâl ve daa doquz ukrainalınıñ rus esirliginden azat etilmesine cevap berdi, dep Oleksandra Barkova Instagramda bildirdi.

“Ne acayip bir haber! Bu kerçek bir bayram, ve men evge qaytqan er kesni ve olarnıñ yaqınlarını bunen hayırlayım”, – dep Ziza qayd etti.

Onıñ aytqanına köre, apishanedeki er bir insan evge qaytmaq vaqıtını tüşünip, bunıñ nasıl olacağınıñ farqlı variantlarını tüşüne.

“Bazılarımız içün böyle bir şey olğanına ne qadar sevindim! Bu arzusı soñunda kerçekleşti. Bunı yapmağa yardım etken acayip insanlarğa teşekkürlerimni bildirem! Teessüf ki, pek çoq ev içün bu sözniñ adiy añlamı şimdi qullanılamaz, bazıları ise artıq yoq, ve bu fikirler bazıda qıyın ola bile”, – dep o mektüpte qayd etti, dep Qırım Sesi haber berdi.

Ziza qayd etti ki, vatandaşlarnıñ deñişimi Kremlniñ siyasiy mabüsleri içün unutılmağanları ve azat etilmeleri içün küreş devam etkenini isbatlay.

“Bu vaqia – vatandaşlarnıñ qaytması – unutılmağanımıznıñ, hatırlanğanımıznıñ ve cenkleşkenimizniñ müim bir işaretidir. Epimizniñ quvanğan evimiz bar, ve iç bir şübem yoq ki, vicdan mabüsi olğan er bir insan, bu cenkniñ mabüsi olğan er bir insan, oña qaytacaq! Bu işte çalışqan er keske teşekkürler! Er kesni bir kere daa selâmlayım”, – dep siyasiy mabüs qayd etti.