Siyasiy mabüs Farhod Bazarovğa cenkke ketmege teklif ettiler

12 Iyün 2024

“Hizb ut-Tahrir davası”nıñ ekinci Aqmescit gruppasınıñ qırımtatar siyasiy mabüsi Farhod Bazarov Rusiyeniñ Ukrainağa cenkinde iştirak etmege red etti. Şu anda o, RFnıñ Saratov vilâyetiniñ Balaşov şeerindeki apishanede buluna.

Apayı Fatime Yanikova bunı añlattı, dep Suspilne haber berdi.

O qayd etti ki, böyle degen terror maddelerine binaen maküm etilgenlerni “SVO”ğa çağırmağanlarına baqmadan, aqayına teklif ettiler.

“Belli olğanı kibi, RF CQniñ 205.5. maddesine binaen maküm etilgenlerni şart-evelden azat etmeyler, olarğa amnistiya bermeyler. Qapatılğan böyle insanlarnı cenkke yollamaylar, lâkin Farhodnıñ yanına kelip, böyle degen “SVO”da iştirak etmege teklif ettiler. Amma aqayım red etti”, – Yanikova añlattı.

Şu anda Kreml reinesi Farhod Bazarov, Balaşov apishanesinden etabını bekley. Mayıs ayınıñ 30. künü belli olmağan yerge onı etap etecek ediler.