Siyasiy mabüs Refat Alimov azat etildi

17 Aprel 2024

8 senege maküm etilgen siyasiy mabüs, “Hizb ut-Tahrir”niñ Yalta gruppasınıñ iştirakçisi olğan qırımtatar Refat Alimov azat etildi.

Advokat Edem Semedlâev Suspilne Qırımğa bu aqqında haber berdi.

“Şimdi birinciden, aqrabalarım ve yaqınlarımnen körüşmege isteyim. Pek kederlenem. Raatlanmağa, tedaviylenmege, tibbiy teşkerüv keçmege isteyim. Bundan soñ ise iş taparım. Çünki soñ sekiz sene devamında anam çalışqan edi. Halqımıznıñ yardımınen, men apishanede olğanda oña yardım etken ediler. Şimdi ise çıqmaq ve çalışmaq kerek. Aynı vaziyette bulunğanlarğa yardım etmek kerek”, — dep Alimov qayd etti.

Advokat Edem Semedlâev Alimovnen körüşmek içün Başqırtistan Cumhuriyetiniñ Salavat şeerine ketti.

“Bugün daa bir siyasiy mabüs, dostumız, qardaşımız azat etildi. 8 senelik üküm, elbette, uzun bir müddettir. Elbette, bu sınavdan itibarnen keçirdi ve bugün onı qarşıladıq. Onı alıp evge, Qırımğa, aqrabaları ve yaqınlarına ketecekmiz. Ve ümüt etem ki, yaqın kelecekte başqa siyasiy mabüslerimiz azat etilir”, — dep uquq qorçalayıcı qayd etti.

Refat Alimov aqqında ne bilemiz

Refat Alimov — 28 yaşındaki qırımtatar, “Hizb ut-Tahrir”niñ Yalta gruppasınıñ iştirakçisi olğan İnver Bekirovnıñ qardaşınıñ oğludır. 2016 senesi çiçek ayınıñ 18-inde onıñ evi tintilgen soñ Refat “terror faaliyetinde iştirak etmege” qabaatlanıp tutuldı.

2019 senesi boş aynıñ 12-sinde Rostov-na-Donuda “Hizb ut-Tahrir”niñ davasınıñ iştirakçilerinen soñ makeme oturışı oldı. Anda üküm çıqarıldı. Makeme oturışı 14 daqqa devam etti.

Makemeciniñ qararına binaen, qabaatlanğan adamlar qabaatlı tanındı: Refat Alimov 1 senege serbestlik sıñırlanmasınen 8 senege, Muslim Aliev 1 senege serbestlik sıñırlanmasınen 19 senege, İnver Bekirov 1 senege serbestlik sıñırlanmasınen 18 senege, Vadım Siruk 1 senege serbestlik sıñırlanmasınen 12 senege, Arsen Cepparov 1 senege serbestlik sıñırlanmasınen 7 senege, Emir-Usein Kuku 1 senege serbestlik sıñırlanmasınen 12 senege maküm etildi.