Qırım köprüne üçünci kere ateş açmağa planlaştıralar – The Guardian

03 Aprel 2024

Yaqın kelecekte ukrain istihbaratçıları, Qırım köprüne üçünci kere ateş açmağa ve onı yoq etmege planlaştıralar. Ukraina Mudafaa nazirliginiñ Bİİden menbalarına atıf aterek, The Guardian bu aqqında haber berdi.

Olarnıñ sözlerine köre, köpürniñ yoq olunması “qaçınılmaz”, İdareniñ reberi Kırılo Budanovnıñ ise “bu maqsatqa irişmek içün vastalarnıñ çoqusı bar”.

“2024 senesiniñ birinci qısmında bunı yapacaqmız”, – menbalardan biri ayttı, dep Qırım.Aqiqat bildirdi.

Aynı zamanda The Guardian qayd etti ki, “Bİİniñ o qadar qorçalanğan maqsatqa dair mahsus oeratsiyanı keçire bilip-bilmeyceginen bağlı şübeler bar”.

Keriç köprü, işğal etilgen Qırımnı Rusiyenen bağlay. 2022 senesi orta küz ayında Qırım (Keriç) köprü patladı. 2023 senesi oraq ayınıñ 17-sinde de Keriç köprü daa bir kere patladı. RF akimiyeti, Ukrainanıñ ordusını patlamalarda qabaatlay ya da patlamalarnı oquvlar kibi tanıy. Kıyiv, tek bazı ücümlerge ait olğanını tasdıqladı.