Qırımnıñ işğaline qarşılıq kününe bağışlanğan Meclisniñ ilânı

Qırımnıñ işğaline qarşılıq kününe bağışlanğan 

Qırımtatar Milliy Meclisiniñ Prezidiumınıñ 

ilânı

2014 senesi rusiye Qırımnı zapt etecek eti. Bu, bütün Ukraina devleti üzerinde kontrolınıñ başlanğıcı olacaq edi.

rusiyeniñ Qırımğa tecavuzı senelerce azırlana edi: malümat boşluğı temizlendi, devlet akimiyetiniñ organlarında ve idarelerinde rus agentleri çalışmağa başladılar, qıırmtatar halqını duşman olaraq kösterdiler.

2014 senesi kiçik ayda Kreml emin edi ki, onıñ ilk emrinen yerli eliniñ yardımınen devlet organları ve quvet müessiseleriden rus agentleriniñ büyük ağı, Moskvanıñ istegeni vaziyet yaratacaqlar, Qırım Yuqarı Şurasınıñ qararına binaen Qırımnı Ukrainadan almağa yardım etecekler.

2014 senesi kiçik aynıñ 26-sında Meclis tarafından teşkil etilgen mitingniñ tahminen 20 biñ iştirakçisi Ukrainanıñ topraq bütünligini destek etti, Kremlniñ planlarını bozdı, Qırımnıñ Ukrainanıñ ayırılmaz parçası ve qırımtatar halqınıñ vatanı olğanını dünyağa kösterdi.

Yazıq ki, 2014 senesi kiçik aynıñ 26-sında kreml agentlerine qarşılıq köstergen Qırımnıñ cemaatı, Ukrainanıñ uquq qorçalayıcı ve mahsus quvetleriniñ qararlı ve devletniñ suverenitetini qorçalamağa yönelgen areketlerini beklep turdı. 

Ukraina devlet akimiyeti ve idaresiniñ organlarınıñ faaliyetsizliginiñ sebebi, içeri siyasit quvetlerniñ küreşi ve liderleriniñ vazifeler ve nazirlikler içün küreşi oldı. Bunıñ içün 2014 senesi 26-27 künleri arasındaki gece rusiye, Qırımnıñ startegik obyektlerini zapt etmege ve Qırım yarımadasındaki USQniñ arbiy qısımları ve bölüklerini bloklamağa imkân aldı. 

10 senelik işğal devrinde Rusiye Qırımnı büyük arbiy boşluqqa çevirdi. Anda Qırımnıñ sakinlerine qarşı kütleviy cinayetlerni yapa, insanlarnı öldüre ve zoraki tutıp qapata, siyasiy sebeplerden insanlarnı taqip ete, fikir, din ve işanç kibi azatlıqlardan marum ete. 

Rus işğalcileri, Ukrainanıñ tamır halqı olğan qırımtatar halqını taqip eteler, Qırımnıñ ealisiniñ demorgafiyası ve qavmiyatını deñiştimege ıntılalar. Bu, cenk cinayetleridir.

2022 senesi kiçik aynıñ 24-ünde rusiye federatsiyası, Ukrainanıñ qıtaviy topraqlarında tolu miqyaslı cenk başlatmaq içün işğal etlgen Qırımnıñ toprağını qullandı. Qırım yarımadası cebege yaqın bölgege çevirildi, bunıñ neticesinde sakinleriniñ ayatı ve sağlığı içün telükeli bir yer oldı.

İşğal etilgen Qırımnıñ sakinleriniñ rus ordusına zoraki moblizatsiyası, rusiyeniñ yarımadada yapqanı daa bir halqara cinayettir.

Faqat Qırımnıñ 10 senelik vaqtınca işğali devrinde qırımtatarlarnıñ ve Qırımnıñ sakinleri olğan farqlı haqlarnıñ vekilleriniñ çoqusınıñ ruhuna bozmadı. Olar, rus işğaline zorbasızlıqnen qarşılıq köstererek, Ukrainağa sadıq qalalar.

Ukraina Silâlı Quvetlerinde ve başqa mahsus arbiy şekillendirmelerinde Qırımnıñ biñlerce sakini hızmet eterek, Ukraina devletiniñ suverenitetini qorçalay.

Qırımnıñ işğaline qarşılıq künü Qırımtatar Milliy Meclisi cesareti ve fedakârlığınen Qırımnı azat etmege cenkleşken Ukraina Mudafaa Quvetleriniñ bütün askerlerine teşekkür bildire, qırımtatar halqına ve Ukraina devletine sadık olğan vaqtınca işğal etilgen Qırımnıñ sakinlerine ürmet ve destek bildire. 

Qırımtatar Milliy Meclisi, Qırımnıñ rus tecavuzcılarından tezce azat etilmesi içün bütün kerekli adımlarını yapmağa devam etecek.

Qırım, Ukrainadır!

Slava Ukraini!

Refat Çubarov

Qırımtatar Milliy Meclisiniñ başı

2024 senesi kiçik aynıñ 26-sı

Kıyiv ş.