Rus müstemlekesinde siyasiy mabüs Danılovıçqa ilâçlarnı bermeyler

08 Fevral 2024

Rus apishanesinde sol qulağı eşitme qabiliyetini coyğan ve Aqmescittteki SİZOda qalp krizini yaşağan qırım cemaat jurnalisti İrına Danılovıçqa ihtiyac duyğanı ilâçlarnı bermeyler. Bu ilâçlarnı almayıp, ciddiy baş ve qulaq ağrısını çeke. 

Siyasiy mabüsniñ babası Bronıslav Danılovıç bunı Suspilne Qırımğa añlattı. 

“Keçken sene ilk qış ayınıñ 1-inde Stavropol kray hastahanesine onı ketirdiler, eki ekim onı baqtı. Neticesi pek yamay niyetli oldı. Yazdılar ki, onı tedaviylemege keç oldı, o hsatalanğan ilk eki aftada onı tedaviylemek kerek edi. Şimdi ise sol qulağınıñ tamamınen eşitme qabiliyetini coyacağını, siñiri ölecegini tek beklemek kerek. Ve keçken sene ilk qış ayınıñ 1-inden başlap, oña evden yollağanım ilâçlarnı bile bermediler. Onı tedaviylemeyler. Er kün pek küçkü sızğır eşitkende ve öz sözlerini eho olaraq eşitkende alıñ yahşı olmaz. Onıñ başı sıq ağıra”, – dep añlattı o.

Bronislav Danılovıçnıñ malümatına köre, müstemlekede aftada eki kere ilâçlarnı bereler. Bu devirde nevbette turğan tek 20-30 insan ilâçlarını ala.

Bundna ğayrı, İrına Danılovıçnıñ babası añlattı ki, qaidelerge köre müstemlekede ilâçlarnı tutmaq mümkün, amma memuriyet olarnı yasaq ete.

Rus müstemlekesinde yaramay sanitar-gigiyena şatları bar. Şu cümleden, sıcaq suv yoq ve tevqif etilgen qadınlar yahşıca yuvunmazlar. Bundan başqa, aş savutları temiz olmağanı sebebinden stevqif etilgen insanlar içekler hastalıqlarını keçeler, olarnı tedaviylemeyler.

“Qış mevsiminde anda 400 insna buluna, 5 suv cihazı bar, amma sıcaq suv yoq. Bazıda yuvunmaq içün buz qullanalar. Duş almaq içün pek az vaqıt bereler. Qızım maña aytqanı kibi “Sabun ala bilesiñ, amma suvnen onı yuvmaq içün vaqtı olmaycaq”. Onıñ eki esas şikâyeti, tedaviylev ve sanitar-yaşayış şartlarıdır”, — dep Bronıslav Danılovıç hulâsa çıqardı.