Qırım sakini Kırıl Barannık baqıy tevqifke maküm etile bilir

31 Yanvar 2024

Vaqtınca işğal etilgen Qırım sakini, sport oriyentirliginiñ sport ustası Kırıl Barannıknı devlet hainliginde ve terror teşkilâtınıñ faaliyetinde iştirak etmekte qabaatladılar. 

Ukrinfrom bu aqqında haber berdi.

İşğal quvetçileri tarafından Qırımda demiryolnıñ patlatılması “dava”sı çerçivesinde tutulğan adamnıñ qabaatını ciddiyleştirdiler. İşğalciler, “diversiya” maddesini daa şiddetli eki maddege (“devlet hainligi” ve “terror teşkilâtınıñ faaliyetinde iştirak etüv” maddelerine) deñiştirdiler. Ruslar, qaysı “terror teşkilâtı” aqqında laf etkenlerini bildirmediler.

Qayd etildi ki, Barannık baqıy tevqifke maküm etile bilir.

2023 senesi mayıs ayınıñ 30-ında işğal etilgen Aqmescitteki yalı kenarında 26 yaşındaki Barannıknı tuttılar. Onıñ başına çuval taqtılar ve soratmaq içün alıp kettiler. Anda azaplar çekerek, kiçik aynıñ 23-ünde Bazarçıq köyünde diversiya yapqanını itiraf etti.