Sanki Çelebicihan batalyonında iştirak etken Herson vilâyetinden qırımtatar adamını tevqif ettiler

08 Yanvar 2024

Herson vilâyetiniñ vaqtınca işğal etilgen toprağından qırımtatar adamını üç sene ve altı ayğa apis ettiler. Ruslar onı Noman Çelebicihan adına qırımtatar batalyonında iştirak etmekte qabaatladılar.

Qanunsız “makeme”niñ qararına atıf eterek Qırım uquq qorçalayıcı gruppası bu aqqında haber berdi. Uquq qorçalayıcı gruppa, qararnıñ metnini aldı.

Metnini QUQG alğan makemeniñ qararına köre Geniçesk rayonınıñ Partizanı köyüniñ sakini 1980 s. doğğan Eldar Alimovıç Kestan, RF CQniñ 208. maddesiniñ 2. qısımında (federal qanunlarda qayd etilmegen silâlı şekillendirüvde iştirak etüv) qabaatlı olaraq tanındı ve üç sene altı ayğa maküm etildi. 2023 senesi boş aynıñ 28-inde Herson vilâyetiniñ böyle degen “Geniçesk rayon makemesi”niñ “makmecesi” Serhiy İndireykin, böyle “qarar” berdi.

Qararnıñ metnine köre 2015 senesi Kestan batalyonğa qatılğan.

Qararnıñ metnine köre 2023 senesi arman ayınıñ 3-ünde Geniçeskte Eldar Kestannı tuttılar. Onı Çobğardaki SİZOda tuta ekenler.

Qırım uquq qorçalayıcı gruppası hatırlata ki, ukrain qanunlarına köre cinayetçi olmağan insanlarnı taqip etmek, Avropa insan aqları şartnamesiniñ 7. maddesiniñ (tek qanun esasında cezalandıruv) bozulmasıdır. Çünki halqara gumanitar uquqqa mücibi RFnıñ vaqtınca işğal etilgen topraqlarda öz cinaiy qanunlarını qullanmaq aqqı yoq.