Aluştada tintüvlerden soñ üç adam tutuldı

_{Fotoresim: Qırım birdemligi} 

İşğal etilgen Qırımda saba saat 6:30ta rus quvetçileri, “Aluşta” mustaqil diniy musulman cemaatınıñ azalarınıñ evlerini tinttiler. Üç insannı tuttılar, dep Suspilne haber berdi.

UPD 3: Saat 13:00te işğalciler “makeme”ge anaları, apayları ve diñleyicilerni yibermediler. Böylece oturış qalapı şekilde keçirildi. Advokatlar Nazim Şeyhmambetov ve Rustem Kâmilev Aluştağa keldiler. Olar “makeme” binasına kirdiler. 

“Makeme” binası ögünde insanlarnıñ toplanmamaları içün işğal politsiyası insanlarnı dağıttı. Olarğa bozğanları maddelerni oqudılar ve olarnı tutmamaları içün kettiler.

UPD 2: Qırımtatarlarnı işğal Aluşta şeer makemesine ketirdiler, dep “Qırım birdemligi” haber berdi.

Vilen Useinovnıñ anası Elmira Useinovanıñ añlatqanına köre, rus quvetçileri cemaatnıñ azasınıñ evini tintmege kelgen soñ “makeme”niñ qararı ola bilgen bir vesiqa kösterdiler. Kâğıt oquğan soñ Useinov onı imzalamağa red etti ve ayttı ki, onı qaysı işte qabaatlağanlarını añlamay.

Tintüv vaqtında evinden 2014 senesi basılğan ve Qırımdaki kitap tükânlarında satılğan qırımtatar haqlınıñ tarihı kitaplarını alıp çıqardılar. Bundan ğayır, bütün aileniñ cep telefonları ve pasportları alıp çıqardılar.

Bundan başqa, Elmira Useinova tasfilâtlıca añlattı ki, oğlunıñ qaysı camige ketmesinen bağlı işğalcilerniñ suali onı şaşırdı.

UPD: Üç tutulğan adamnı Aluştadaki politsiya bölügine alıp ketirdiler.Edem Semedlâyev, olarnıñ advokatı olacaq. Boş aynıñ 23-ünde tutulğan qırımtatar adamlarınıñ makeme oturuşları keçirilir, amma olarnı qaysı maddede qabaatlağanları alâ daa belli olmay.”Qırım birdemligi” mühbiri bu aqqında haber berdi.

Böylece, Aluşta şeer bölgesindeki Yuqarı Şuma köyünde işğalciler, din ve cemaat erbabı olğan Vilen Useinovnıñ evini tinttiler.

“Bugün qız qardaşımnıñ evini tinttiler. Onıñ aqayı – 1981 senesi doğğan Usein Vilen Useinovıç. Onıñ 4 balası bar. Bundan ğayrı, olarnen beraber evinde Vilenniñ anası yaşay. O, muntazam fan damarı basımını çeke. Amma şu anda evlerine aqrabalarını yibermeyler, iç kimsege esabat bermege mecbur olmağanlarını aytıp, er kesni azbardan çıqardılar”, — dep Vilen Useinovnıñ aqrabası Fatima Ğafarova qayd etti.

Yuqarı Şuma köyünde “Aluşta” diniy cemaatınıñ ve “Yuqarı cami”niñ imamı Yusuf Aşırovnıñ evini de tinttiler.

Bundna ğayrı, cemaatnıñ azası olğan Zinur Appazovnıñ evini tinttiler.

“Qırım birdemligi”niñ bildirgenine köre bütün üç qırımtatar adamını tuttılar, amma olarnı qaysı maddede qabaatlağanları ve neniñ esasında evlerini tintkenleri belli olmay. Tutulğan adamlarnıñ aqrabalarınıñ bilgilerine köre, “Aşırıcılıqqa qarşılıq merkezi” işçileri evlerini tinttiler.

“Aluşta” diniy musulman cemaatınıñ azalarınıñ evlerini tintüvler aqqında ne bilemiz

İşğal akimiyeti, mustaqil diniy musulman cemaatına çoq kere tesir etti, dep imam Yusuf Aşırov añlattı. 2019 senesi bozarğan aynıñ 10-unda Aluşta şeeri ve Körbekül köyü ve Büyük Lambat qasabasında dört qırımtatar adamınıñ evlerini tintken ve olarnı tutsan soñ cemaatnıñ başı Lenur Halilov ve teftiş eyyetiniñ azası Ruslan Mesutovnı da tuttılar.

2020 senesi bozarğan ayda işğalciler, “qanunsız missioner faaliyeti” sebebinden Aşırovğa 5 biñ rublelik para cezasını berdiler.