Planlaştırılğan tedbirler – ukrain istihbaratı Qırımdaki patlamalar aqqında

20 Sentâbr 2023

RF tarafından vaqtınca işğal etilgen Qırımdaki Duvanköy rayonında bir qaç patlama duyuldı. Bu patlamalar, ukrain Mudafaa quvetleriniñ planlaştırılğan tedbirleri olğan eken, dep Apostrof haber berdi.

Milliy telemarafonnıñ canlı yayınında Mudafaa naziriginiñ Baş istihbarat idaresiniñ nutuqçısı Andriy Yusov bunı añlattı. 

Onıñ sözlerine köre, bugün ukrain Telükesizlik ve mudafaa quvetleriniñ işğalcilerniñ vaqtınca işğal etilgen Qırımdaki arbiy obyektlerine dair planlaştırılğan işi devam etken. 

Bundan ğayrı, o qayd etti ki, yaqın kelecekte bir neticeli tedbirler kompleksi olacaq Qırımdan pek çoq haber olacaq.

Andriy Yusov bildirdi ki, bu basamaqta işğalcilerniñ obyektlerine ücümleriniñ esas maqsadı, tecavuzcınıñ quvetlerini azlaştırmaq ve zayıflaştırmaqtır. Çünki başqa cebe yerlerine quvetleri ve cihazlarını ketirmek içün Rusiye Qırımnı logistika habire olaraq qullanır. 

Qayd etmek kerek ki, Duvanköydeki arbiy qısımğa bir şey urdı, faqat vaziyetni yahşılaştırmaq maqsadınen rusiye telükesizlik quvetleri inandırdılar ki, Aqyar etrafında sanki bağ yanğan, o yerge “tüşürilgen uçucısız aletniñ parçaları tüşken”.