rusiye apishanelerde 117 qırımtatar siyasiy mabüsni tuta – Bariiev

11 Avgust 2023

RF apishanelerinde 175 siyasiy mabüs tutula, olardan 117si – qırımtatar halqınıñ vekilleri. 2023 senesiniñ 6 ayı devamında 101 insan tutuldı, olardan 66-sı – tamır halqınıñ vekilleridir.

FREEDOM telekanalınıñ canlı yayınında Meclisniñ azası Eskender Bariiev bu aqqında haber berdi.

Bundan ğayrı Bariiev qayd etti ki, insanlarnı taqip etmek içün er sene RF yañı aletler ve usullarnı tüşünip çıqara.

“2022 senesinden evel “Hizb ut-Tahir” ya da “Yehovanıñ şaatları” teşkilâtlarını yasaq etmege dair öz qanunlarını qanunsız olaraq qullana ediler, endi 2022 senesi yañı usul çıqarıldı: Rusiye Federatsiyasınıñ makemesi, Noman Çelebicihan adına batalyonnı terrorcılıq teşkilâtı olaraq tanıdı. Bundan ğayrı, em Memuriy, em de Cinaiy qanunnamelerde yañı qaideler peyda oldı: Rusiye Federatsiyasınıñ Silâlı quvetleriniñ ayırımı. Ve RF Cinaiy qanunnamesiniñ tamam bu qaidesine mücibi insanlar endi taqip olundılar”, – dep Bariiev diqqat celp etti.

Bariievnıñ bilgilerine köre, 2015 senesinden başlap rus işğalcileri, qırımtatar halqınıñ timsallerini yasaq etmege ıntılalar. Ve Qırımda tevqif etilgen ve tutulğan insanlarnıñ çoqusı – qırımtatar halqınıñ vekilleridir. 2023 senesiniñ 6 ayı devamında uquq qorçalayıcılar, 101 tutulğan insannı qayd ettiler, olardan 66sı qırımtatarlardır.

“2023 senesiniñ tek altı ayı devamında 101 insan tutuldı, olardan 66-sı qırımtatarlardır. 37 ev tintildi, olardan 29-ı – qırımtatarlarnıñ evleridir. Biz, 140 tevqif etilgen insannı sayladıq, olardan 93-ü ise qırımtatar halqınıñ vekilleridir. İşğalciler 93 insannı soradılar olardan 73-ü qırımtatarlarğa dair”, – dep añlattı o.

Yarım sene boyunca uquq qorçalayıcılar, 156 insannıñ adaletli makeme aqqı bozuldı, olardan 103-ü qırımtatarlarğa dair.