Qırımtatar Milliy Meclisiniñ Prezidiumınıñ  Halqara dünya tamır halqları kününe bağışlanğan ilânı

09 Avgust 2023

İlân

Halqara dünya tamır halqları kününe bağışlanğan Meclisniñ Prezidiumından

Er sene arman ayınıñ 9-ında insanlar, 1994 senesi BMTnıñ Baş Assambleyasınıñ ilân etkeni Halqara dünya tamır halqları kününi qayd eteler.

Dünyada 90 ülkede yaşağan tamır halqlarınıñ tahminen 476 mln temsilcisi bar. Tamır halqları, 5000 çeşit-türlü medeniyet ve dünya tilleriniñ çoqusınıñ saipleridir. Olarnıñ umumiy sayısı ise tahminen yedi biñdir.

Tamır halqları, yekâne medeniyetler ve adetlerniñ saipleridir, insan ve tabiat arasındaki eanklikni saqlaylar.

Bulunğanları cemaat ceetindekilerden başqa olğan öz tarıhı, içtimaiy-iqtisadiy ve medeni hususiyetlerini saqlamaq içün tamır halqları, devletlerniñ tamır halqlarınıñ aqları saasında halqara uquqnı, şu cümleden BMTnıñ tamır halqlarınıñ aqları aqqında beyannamesini riayet etmelerine ihtiyac duyalar.

2007 senesi BMTnıñ tamır halqlarınıñ aqları aqqında beyannamesini tasıqalamağa bitaraf olğan Ukraina devleti, 2014 senesi saban ayınıñ 20-sinde BMTnıñ tamır halqlarınıñ aqları aqqında beyannamesini destegini bildirip, tamır halqlarınıñ aqlarına munasebetini deñiştirdi. 2021 senesi oraq ayınıñ 1-inde Ukraina Yuqarı Şurası, «Ukrainanıñ tamır halqları aqqında» qanunnı tasdıqladı. Anda Ukrainanıñ tamır halqlarınıñ uquqiy statusı tesbit etildi ve olarnıñ kollektiv aqlar ve şahsiy aqlarnı yerine ketirmeleriniñ uquqiy kefaletleri qayd etildi.

On senedir devam etken ve maqsadı Ukraina devletini yoq etmek olğan Rusiyenin Ukrainağa qarşı arbiy tecavuzı ve Qırımnıñ işğali, Ukrainanıñ tamır halqlarınıñ yaşayışı içün telükedir.

Ukrainanıñ tamır halqlarınıñ kelecegi, Qırımnıñ keleceginen bağlıdır. O, Ukrainanıñ ayırılmaz qısmıdır.

Qırımtatar Milliy Meclisiniñ Prezidiumı, Qırımnıñ statusına dair deñişmelerniñ Ukraina Qanunnamesine kirsetmek kerekligini destek etken bütün ukrain vatandaşlarına minnettarlığını bildire. Bu değişmeler vastasınen qırımtatarlarnıñ Ukraina devleti terkibinde özüni identifikatsiya aqlarını yerine ketimeleri ve Ukrainanıñ toprak bütünligi telükeleriniñ yoq etilmesi içün uquqiy mehanizmler yaratılacaqtır.

Qırımtatar Milliy Meclisiniñ Prezidiumı qırımtatarlar, karaimler, qırımçaqlar, bütün ukrain vatandaşlarını Halqara dünya tamır halqları kününe hayırlay!

Yaşasın Qırım!

Ukrainağa şan-şerefler olsun!



Qırımtatar Milliy Meclisiniñ Başı Refat Çubarov 


Kıyiv ş.