“Hansaray” müzeyiniñ sabıq müdiri Server Ebubekirov vefat etti

26 Iyül 2023

Tünevin oraq ayınıñ 25-inde işğal etilgen Qırımda qırımtatar tilşınası ve “Hansaray” adlı qırımtatarlarnıñ tarihı ve medeniyeti müzeyiniñ sabıq müdiri Server Ebubekirov vefat etti.

Halq mebusı ve Meclisniñ başınıñ muavini Ahtem Çiygöz bu aqqında Suspilne Qırımğa haber berdi.

Onıñ sözlerine köre Ebubekirov, yarımadanıñ rus işğaline qarşılıqnıñ pek aktiv medeniyet faalcisi edi.

“Men onı çoq senedir bilem, 90. senelerden berli, o zaman onen tanış oldım. O zamanlarda men bölge Meclisinde edim, o ise Hansaray müzeyiniñ başı olıp çalışa edi. O pek malümatlı, çoq bilgen edi, onen laf etmek meraqlı edi, onıñ bilgileri ayrette qaldıra edi. Bizim içün 90. seneleri devrinde Bağçasaray rayonınıñ topraqlarında öz tarihımıznı ögrengende o, endi pek çoq bile edi. O devirde pek faal edi. Başqaları kibi işğal devrinde işğalge qarşı oldı. Onıñ qorantasınen subet ettim”, – dep Çiygöz añlattı.