Qırımtatar bayrağı kününe bağışlanğan Meclisniñ başınıñ hayırlavı

26 Iyün 2023

Qırımtatar halqınıñ zemaneviy tarihında müim künlerden biri, bozarğan aynıñ 26-sında qayd etilgen Qırımtatar bayrağı künüdir.

1917 senesi ilk qış ayında Bağçasarayda toplanğan 1. Qurultaynıñ vekilleri tarafından tasdıqlanğan qırımtatar Milliy bayrağı, qırımtatar halqınıñ milliy bayrağı statusında 1991 senesi bozarğan aynıñ 26-30 künleri Aqmescit şeerinde toplanğan 2. Qurultaynıñ vekilleri tarafından alğışlandı.

Qırımtatar milliy bayrağı – nesillerniñ birligi, özüni identifikatsiya etmesi, kelecegini ve qırımtatar halqınıñ öz azatlığı içün küreşini köstergen ayırıcmaz bir timsaldir.

rusiye Qırımnı işğal etiken soñ bütün dünya içün mavı bayraqta altın tamğa, tamır qırımtatar halqınıñ yeñilemez ve cesaretiniñ, onıñ aqları ve Ukrainanıñ Qırım üzerinde devlet suverenitetini yañıdan tesbit etmesi içün küreş timsali oldı.

2014 senesinden başlap er sene bozarğan aynıñ 26-sında Ukrainanıñ memuriy binaları, ecnebiy ülkelerde Ukrainanıñ diplomatik müessiseleriniñ binaları, Ukraina Silâlı Quvetleriniñ Arbiy-deñiz quvetleriniñ gemilerinde qırımtatar bayrağını köterilir.

Şübe yoq ki, Telükesizlik ve Ukrainanı mudafaa quvetleriniñ askerleri, göñülliler, ukrain cemaatı, işğal etilgen Qırımda ve rus apishaneleriniñ ceza odalarında rus işğalcilerine qarşılıq köstergen ukrain vatandaşları yardımınen yaqın kelecekte azat etilecek Qırımda ve Ukrainanıñ devlet bayrağı ve qırımtatar milliy bayrağı yañıdan dalğalanacaqlr.

Qırımtatar Milliy Meclisi vatandaşlarnı Qırımtatar bayrağı kününen hayırlay!

Ukrainağa şan-şerefler olsun!

Qırımtatar halqına şan-şerefler olsun!

Refat Çubarov

Qırımtatar Milliy Meclisiniñ başı

Kıyiv ş.,

2023 senesi bozarğan aynıñ 26-sı