Meclisniñ habersiz ğayıp olğan sabıq azası Eldar Mensitov mahsus bölükte tapıldı

12 Iyün 2023

Foto: Qırım birdemligi

Qırımda ğayıp olğan Qırımtatar Milliy Meclisiniñ sabıq azası Eldar Mensitov, Aqmescit şeerinde memuriy tutulğanlar içün mahsus bölükte buluna. Qırım.Aqiqat bu aqqında haber berdi.

Advokat Safiye Şabanovanıñ aytqanına köre, Mensitov 15 künge apiske alğanlar. O, «Jeleznodorojnıy» polis bölüginde buluna ve Rusiye Federatsiyasınıñ Memuriy uquq bozuvları qanunnamesiniñ 19.3 maddesine mücibi (uquq qorçalayıcı organlarnıñ hadimini riayet etmeme) apiske alındı.

– Bozarğan aynıñ 9-ında 9-nda onı yol patrul hızmet hadimleri onı yol patrul hızmet hadimleri tuttılar. O, evge kete edi. Maşnalarına keçmege rica etkenler, soñ mavı Folksvagen keldi, Eldarnıñ başına çuval kiydirgenler. Soñ mahsus hızmet hadimleri onı bir mağazğa alıp kettiler, anda sorğuğa çekip, qanunsız usullarnı qullanğanlar. Ertesi künü onı aşırıcılıqnen küreş merkeziniñ hadimlerine bergenler, soñ ise Jeleznodorojnıy rayon makemesine alıp ketkenler ve «politsiya hadiminiñ qanuniy talaplarını riayet etmeme» sebebinden 15 künge apiske alğanlar. Körüşüv vaqtında küç qullanuv izlerini kördim, – dep advokat añlattı.

Makemede Mensitov qabaatını tanımadı ve politsiya hadimlerini riayet etti, dep bildirdi. Makemeci Galina Tsıganova Mensitovnıñ aytqanlarına qulaq asmayıp, onı memuriy apis cezasına üküm etti.

Bozarğan aynıñ 10-unda Elvira Mensitova aqayı hırsızlandı, dep bildirdi. Soñki sefer qorantasınen bozarğan aynıñ 8-inde, kündüz üyle vaqtında, bağlanğan edi, ve işten qaytmadı. Eldar Mensitovnıñ arabası Aqmescitteki «Krımskiy privoz» bazarında tapıldı. Mensitov alış-veriş yapıp ğayıp oldı.