Arbiy yoldan başqa olmaz, – dep Cemilev Qırımnı azat etüv aqqında

17 Mayıs 2023

Qırımtatar halqınıñ lideri haber berdi ki, Qırımnı Ukrainanıñ terkibine qaytaruv tek arbiy yolnen mümkündir. Bundan ğayrı Mustafa Cemilev qoştı ki, qırımtatarlar USQni bekleyler, dep 24 kanal bildirdi.

Mustafa Cemilev añlattı ki, işğal etilgen yarımadada qalğan añlı insanlarnen laf etti ve qırımtatarlarnıñ Ukrainağa munasebeti pek müsbettir: “topraqnı ceennemge çevirseñiz de, çabikçe keliñiz”. Amma Qırım Ukrainağa barışıq yolunen endi qaytarılmaycaqtır.

– Olar, aytışmalar içün bütün yollarnı qapattılar. Ve şimdi arbiy yoldan başqa bir şey qalmay. Qırımdan vatandaşlarım telefon etkende işler ve istiqbal nasıl dep sorağanda men, quvet qaytaruvı olacaq dep belleyim. Şu cümleden, Qırımdaki arbiy obyektlerge ateş açacağımıznı aytam, – dep Cemilev qayd etti.

Cemilev hatırladı ki, tolu miqyaslı tecavuznıñ başlanğıcında rus-ukrain aytışmaları vaqtında Ukrainanıñ esas talabı, duşmannıñ ordusını 2022 senesi kiçik aynıñ 24-ündeki mevamlarğa qaytarmaq edi. Qırım ve Donbas meseleleri ayrı şekilde al etilecek ediler. Amma Putinniñ mesleatçısı Peskov acelen bildirdi ki, Qırımnıñ Ukrainağa qaytaruvı muzakere etilmeycektir.