Abdureşit Ceppar 12 künlik tevqiften soñ azat etildi

08 Mayıs 2023

Foto: Qırım birdemligi

İşğal etilgen Qırımda qırımtatar uquq qorçalayıcısı Abdureşit Ceppar 12 künlik tevqiften soñ azat etildi. Svoboda Radiosı bu aqqında haber berdi.

Beyanatqa mücibi, Aqmescit şeerinde politsiya bölügi yanında aqrabaları, faalciler ve advokatları onı qarşıladılar. Şu cümleden olarnıñ yanına OMON ve rusgvardiyanıñ işçileri kelip, video çıqarmağa yasaq ettiler, advokatlarnıñ ise pasport bilgilerini yazdılar.

Abdureşit Ceppar azat etilir-etilmez añlattı ki, saba maalinde eviniñ yataq odasında pıştav ve avtomatnen qorqutaraq onı tuttılar.

– Bundan soñ da evde tertipsizlik yaptılar, tinttiler, – dep qoştı.

Çiçek ayınıñ 25-inde tahminen saat 7:00de Cepparnıñ evini tinttiler. Tintüv vaqtında evde apayı ve 14 yaşındaki qızı buluna ediler. Er kesniñ cep telefonını alıp çıqardılar ve advokatına telefon etmege izin bermediler.

Evini tintken soñ rus quvetçileri, qırımtatar içtimaiy faalicisini tuttılar. Aynı kün rusiyeniñ kontrol etkeni Bilohirsk rayon makemesi onı qabaatlı olaraq tanıdı ve “politsiyanıñ işçisiniñ qanuniy talaplarını riayet etmegeni içün” 12 künge memuriy tevqif etti.