Refat Çubarov, rusiyeniñ Qırımda ketigeni zararnı qıymetlendirmek müimligi aqqında

24 Aprel 2023

rusiyeniñ Qırımnı aneksiya etmesi neticesinde Ukrainağa ketirilgen zararlarnı ihtisasiy araştırmalar, tecavuznıñ ödemeli olacağı para tazminatınıñ miqdarınıñ belirlenmesine temel oluştıracaq. UNNge eksklüziv intervyda Qırımtatar Milliy Meclisiniñ başı Refat Çubarovnıñ añlatqanına köre, araştırma devam etmeli ve ruslarnıñ ketirgenleri bütün zararlarnı qayd etmeli.

– Bu tür araştırmalar müim olalar, çünki bütün raqamlar, cenk tazminatını ödev aqqında kelecek vesiqalarnıñ temeline qoyulmalı. Er kes bilir ki, şu anda olğan vaqialarnıñ ve zemaneviy rusiyeniñ çevirgeni şeyniñ sebebi – cezalanmağan yamanlıqtır. Soviet birligi ve kommunist rejimi şartlarındaki 20. asırdaki qorqunç cinayetlerni yapqan insanlar ceza almadılar ve şimdi böyle kütleviy cinayetler yañıdan yapıldı. Bunıñ içün bçyle hulâsa çıqaram: Qırımnıñ aneksiyası sebebinden Ukrainağa ketirilgen zararlarnı araştırmaq müimdir, – dep Qırımtatar Milliy Meclisiniñ başı bildirdi.

Refat Çubarovnıñ fikrine köre, şun anda eñ az üç million grivnalıq zararnıñ miqdarı artacaq.

– Men tüşünem ki, bu raqam mıtlaqa artacaq. Çünki alâ daa qayd etilmegen ya da tesbit etilmegen zararlar çoq… Elbette añlaşılır ki, rus-ukrain cenkinde ğalebe qazanacağımız  ve topraq bütünligimizni qaytaracağımız soñ bizim toqtamaq aqqımız olmaycaq. Maqbul halqara aktlarnen qayd etilmeli bir qaç madde bar. Birinciden – rusiyeniñ kapitulâtsiya aktı, anda rusiyeniñ Ukrainağa ödeycek cenk tazminatınıñ miqdarı, onı ödeme şartları ve yol-yoruğı açıq-aydın tarzda qayd etilmeli. Ekincisinden – tekraralamama kefaletleri: bu tür tecavuz yapa bilecek rus ordusınıñ yañıdan teşkil etilmemesine dair açıq-aydın yasaqlar, – dep Refat Çubarov qoştı.