USQniñ Baş ştabı: İşğal etilgen Qırımda rus quvetçileri, zorbalıq qullanaraq filtrlev tedbirlerini pekiteler

30 Mart 2023

Qırımda rus quvetçileri, grajdan ealige zorbalıq qullanaraq, filtrlev ve qarşı istihbarat tedbirlerini pekiteler. Saban ayınıñ 30-ında saba esabında Ukraina Silâlı Quvetleriniñ Baş ştabı bu aqqında haber berdi.

– Qırım Muhtar Cumhuriyetiniñ vaqtınca işğal etilgen topraqlarınıñ bazı meskün yerlerinde rus tecavuzcıları, Ukraina vatandaşlarına basım etmege ve insan aqlarını bozmağa devam eteler. Şu cümleden, Krasnoperekopskta TFHniñ işçileri, aşalayıcı filtrlev ceryanınen grajdan ealini urbasını soyundırtaraq, urıp sorayaraq, faal qarşı istihbarat tedbirlerini keçireler, – dep USQniñ Baş ştabı bildirdi.

Cenk şartlarında mustaqil menbalardan mezkür malümat isbatlamaq zor, dep Qırım.Aqiqat yazdı.

Saban ayınıñ başında USQniñ Baş ştabı, Ukrainanıñ cenübiniñ işğal etilgen topraqlarında filtrlev tedbirleriniñ pekitilmesini bildirdi.

“Agentstvo” rus neşiri haber berdi ki, Aqmescitteki SİZOda rus ordusınıñ ya da mahsus hızmetlerniñ Ukrainanıñ işğal etilgen topraqlarında tutqanları 50-100 arasında ukrainalı buluna.

Rus akimiyeti ve makemeleri, işğal etilgen topraqlarda ukrainalılarnıñ tutulmalarını isbatlaylar, amma olarnıñ sayısı bildirmeyler.