Türkiye Büyük Millet Meclisiniñ mebuslarınen Qırımtatar Milliy Meclisniñ körüşüvi

27 Fevral 2023

2023 senesi kiçik aynıñ 24-ünde Kıyiv şeerinde Qırımtatar Milliy Meclisiniñ Başı Refat Çubarov ve Qırımtatar Milliy Meclisiniñ azası Riza ŞEVKİEV, Ukrainadaki Türkiye fevqulade ve salâhiyetli elçisi Yağmur Ahmet GÜLDEREniñ ozğarğanı Türkiye Büyük Millet Meclisiniñ mebusları Ahmet YILDIZ ve Hakan SİDALİnen körüştiler.

Türk parlametçileri Ahmet YILDIZ ve Hakan SİDALİ Kıyiv şeerini resmen ziyaret ettiler. O vaqtında Kıyivde rus ordusınıñ Ukrainanıñ qıtaviy topraqlarına tolu miqyaslı tecavuzınıñ ilk seneligine çeşitli devlet tedbirlerinde iştirak ettiler. Tünevin ise Ahmet YILDIZ ve Hakan SİDALİ İrpin şeerine ketip, 2022 senesi kiçik – saban aylarında rus askerleriniñ yapqanı cinayetler yerlerini kördiler.

Subet başlağanda Refat ÇUBAROV ve Riza ŞEVKİEV, 2023 senesi kiçik aynıñ 6-sında Türkiyede olğan ciddiy zelzeleniñ ağır neticeleri sebebinden türk halqına taziye bildirdiler.

Aynı zamanda mebuslar Ahmet YILDIZ ve Hakan SIDALI, Türkiyege zarar körgen kişilerni qurtarmağa yardımcı olğan birinci devletlerden biri olğan Ukraina devletininiñ areketlerini qayd etti.

“Türk cemaatı, tış duşmanen cenk vaziyetinde bulunğan ve inanılmaz zorluqlar çekken ukrainalılarnıñ öz qomşusını qol tutmasınen pek tesirli oldı”, dep türk parlamentçileri qayd ettiler.

Türkiye parlamentiniñ azaları, Qırımtatar Milliy Meclisiniñ teşebbüsini destek etken ve gumanitar yardım tolmağa ve zelzeleden çoq zarar körgen Türkiyeniñ bölgelerine onı ketirmege yardımcı olğan Ukraina vatandaşlarına teşekkür bildirdiler.

Körüşüvniñ iştirakçileri, rusiyeniñ işğal etkeni Qırımnen beraber Ukrainadaki vaziyetke ve qırımtatar halqınıñ vaziyetine dair tüşünceleri ve qıymetlendirüvlerinen paylaştılar. Aynı zamanda eki taraf muntazam Ukraina ve Türkiyeniñ işdeşligine, siyasetçilerniñ ve içtimaiy bölükniñ teşkilâtlarınıñ işdeşligine yönelgen muayyen tekliflerni aytıp, muzakere ettiler.

******************

Ahmet YILDIZ – üküm etken Adalet ve inkişaf fırqasından Türkiye Büyük Millet Meclisiniñ mebusı, AŞPAda türk parlament delegatsiyasınıñ reberi

Hakan SİDALİ – muhalif Eyi fırqadan Türkiye Büyük Millet Meclisiniñ mebusı, AŞPAda türk parlament delegatsiyasınıñ vekili